Amal merekesine oraı Mańǵystaýda jas qarılar quran oqýdan jarysty

AQTAÝ.QazAqparat - Bıylǵy Amal meıramy Mańǵystaý oblysynda izgilikke úndeıtin ıgi is-sharadan bastaý aldy. «Otpan taý» tarıhı-tanymdyq etno-mádenı keshenindegi «Qarashańyraqta» Adaı atanyń rýhyna quran baǵyshtalyp, jas qarılar qurandy jatqa oqýdan synǵa tústi, dep habarlaıdy QazAqparat tilshisi.

«Jarys óte áserli boldy. Kıeli orynda quran oqý, Alladan shapaǵat tilep, ata-baba rýhyna quran baǵyshtaý óte saýapty is boldy dep oılaımyn. Qurannyń árbir súresi saýapqa teńelmek. Mundaı úrdis dástúrli sıpat alsa, aldaǵy ýaqytta óz jalǵasyn tapsa degen ıgi tilek bar», - dedi ustaz Aıbek Sateshov

Aıbek Sateshovtyń aıtýynsha, baıqaýǵa 26-shaǵynaýdandaǵy oblystyq «Beket ata» meshitinen arnaıy kelgen 20 jas qatysty. Bas júlde qory 150 myń teńgeni qurady. Ekinshi orynǵa 100 myń, al úshinshi orynǵa 50 myń teńge berildi. Qurandy jatqa oqý saıysynda 14 jastaǵy Álı Qoshmanov jeńimpaz atandy.

«Qurannyń 10 parasyn jattadym. Bul degenimiz kıeli kitaptyń úshten bir bóligin quraıdy. Osy jolǵy saıysta qurannyń 3 parasy boıynsha ıaǵnı, 28,29,30-paralaryna qatysyp, birinshi oryndy aldym. Óte qýanyshtymyn», - dedi Álı Qoshmanov.