Alys shetelderden 400 mln dollar qaıtaryldy - Berik Asylov

ASTANA. QazAqparat - Búgin Bas prokýrordyń tóraǵalyǵymen Ekonomıkalyq resýrstardy zańsyz shoǵyrlandyrýǵa qarsy is-qımyl máseleleri jónindegi vedomstvoaralyq komıssııanyń kezekti otyrysy ótti dep habarlaıdy QazAqparat.

Jınalysty ashqan Berik Asylov aǵymdaǵy jyldyń bes aıyndaǵy komıssııa jumysynyń nátıjelerinen habardar etti. Atap aıtqanda, jalpy somasy 630 mlrd teńgeden astam memleketke zalal óteldi jáne aktıvter qaıtaryldy. Alys shet elderden shamamen 400 mln dollar elge kirgizildi.

«Qadaǵalaý aktileri boıynsha 5 mlrd teńge somasyna 140 myń gektardan astam zańsyz berilgen nemese nysanaly maqsaty boıynsha paıdalanylmaǵan jer ýchaskeleri qaıtaryldy.

Keden salasynda prokýrorlyq tekserý nátıjeleri boıynsha bıýdjetke 57 mlrd teńge tústi.

Sottarǵa quny 13,5 mlrd teńge bolatyn múlikti memleketke qaıtarý týraly 13 talap qoıý engizildi», - dedi Bas prokýror.

Joǵarǵy Sotqa olıgopolııalar paıdasyna shyǵarylǵan sot aktilerin qaıta qaraý jóninde 23 narazylyq engizildi. Búginde olardyń ishinde 16 narazylyq qanaǵattandyryldy, nátıjeleri boıynsha bıýdjetke 23 mlrd teńge túsýi kútilýde. Taǵy 7 narazylyq qaralyp jatyr.

Qadaǵalaý organynyń basshysy Memleket basshysynyń osy saladaǵy tapsyrmasyn iske asyrýǵa tartylǵan árbir ýákiletti organnyń rólin erekshe atap ótti.

Ol sondaı-aq aktıvterdi qaıtarý jónindegi komıssııanyń árbir sheshimi adal bızneske aralasý jáne qysym jasaý faktilerine jol bermeı, baıypty jáne zań talaptary sheńberinde ǵana qabyldanýy tıis ekenin eske saldy.

Otyrys qorytyndysy boıynsha komıssııa jumysynyń tıimdiligin odan ári arttyrý jóninde sheshimder qabyldandy.

Foto: twitter.com/Asylov_GenPr