«Alypsatarlar Azıada bıletterin «ala almaıdy» – respýblıkalyq basylymdarǵa sholý

ASTANA. 23 jeltoqsan. QazAqparat - Qazaq aqparat agenttigi respýblıkalyq basylymdarda 23 jeltoqsan, beısenbi kúni shyqqan ózekti materıaldarǵa sholýdy usynady.

***

«Aıqyn» gazetiniń búgingi aptalyq nómirinde «Mádenı mura» ulttyq jobasy Táýelsizdigimizdiń 20 jyldyǵyna tartý-taralǵy ázirledi» degen taqyryppen aqjoltaı jańalyq jarııalandy. Maqala avtorynyń jazýynsha, «Mádenı mura» baǵdarlamasynyń arqasynda tarıhı qundylyqtarymyz da túgeldenip jatyr. Máselen, ekinshi Tal­dy qorymynan tabylǵan b.d.d. VI ǵasyrlarǵa jatatyn adamnyń múrdesi, saq-sibirlik ań mánerinde jasalǵan altyn buıymdar ertedegi ónerdiń erekshe úlgisin kórsetse, tonalǵanyna qaramastan, qorǵannan 200-ge tar­ta iri, 20 myńnan asa usaq zat ta­bylǵan. Arheologtardyń aıtýynsha, tabylǵan altyndardyń sapasy óte joǵary eken. Arada san ǵasyr ótse de, altyndar sap-sary qal­pyn­da saqtalǵan. Tarıhı qundylyqtarymyzǵa qatysty osy jáne ózge de málimetterdi bilgińiz kelse, «Aıqynnyń» aptalyq nómirine zer salyńyz.

Sondaı-aq «Aıqynnyń» aptalyq sanynda «Sútte de sansyz syr bar» degen taqyryppen maqala basyldy.«Qasıetti Paıǵambarymyzdyń Mıǵraj túni rýhymen jáne denesimen kókke kóterilip, Allanyń quzyrynda bolyp qaıtqanyn musylman balasynyń bári de bilse kerek. Hadıs boıynsha, sol bir múbárak túnde Jábireıil perishte Paıǵambardyń aldyna ydyspen úsh nárse tartady: bir kese sharap, bir kese bal jáne bir kese sút. Paıǵambar osylardyń ishinen sútti tańdaıdy. Jábireıil perishte sonda: «Sen ózińniń tabıǵatyńa saı jaratylys máıegin tańdadyń» deıdi Paıǵambarǵa», delingen maqalada. Osy oraıda maqala avtory adamzattyń da, jan-janýar­dyń da jaryq dúnıege alǵash qadam basqandaǵy birinshi azyǵy - súttiń qadir-qasıeti jaıly oı órbitedi.

***

Alash aınasy» basylymynyń búgingi sanynda «Elimizde áli kúnge gematologııalyq ortalyq joq» degen taqyryppen problemalyq maqala jarııalandy. Maqalada elimizdegi onkologııalyq aýrýlarǵa qatysty qalyptasqan jaǵdaı baıandalady. Basylymnyń habarlaýynsha, elimiz onkologııalyq aýrýlar jóninen jyl saıyn joǵary satyǵa órlep barady. Osydan 10 jyl buryn TMD elderi arasynda 8-orynǵa taban tirese, búginde odan satylap, 6-orynǵa jaıǵasty. «Kóńil kónshiterlik derek emes, árıne. Eń qorqynyshtysy - bul aýrý túrine shaldyqqandardyń jasaryp bara jatqandyǵy», - deıdi maqala avtory.

Sondaı-aq osy basylymda «Alypsatarlar Azıada bıletterin «ala almaıdy» degen taqyryppen maqala jaryq kórdi. Onda elimizde ótetin Azııa oıyndarynyń uıymdastyrýshylarmen bolǵan baspasóz máslıhatynda kóterilgen máseleler jóninde baıandalady. Maqala avtorynyń jazýynsha, baspasóz máslıhatynda uıymdastyrýshylar qysqy Azııa oıyndarynyń bıletterin taratý men ótkizýdiń josparyn oryndaý úshin biregeı bılettik ótkizý júıesi jasalǵandyǵyn jetkizgen.

***

«Kazahstanskaıa pravda» basylymynyń jazýynsha, keshe Almatyǵa gazben júretin avtobýstardyń alǵashqy legi jetkizildi. Mundaı kólikterdi qala ákimshiligi jańadan qurylyp jatqan avtobýs parki úshin alyp otyr. Mamandardyń aıtýynsha, arnaıy tender negizinde utyp alynǵan avtobýstar jolaýshylar úshin jaıly, barlyq tehnıkalyq talaptar men normalarǵa jaýap beredi. Qala ákimshiligi bul kólikterdiń Almatynyń ekologııalyq jaǵdaıǵa oń áserin tıgizedi dep úmittenip otyr. Maqala «Daesh gazıfıtsırovannyı transport!» degen taqyryppen jarııalandy.