«Alvares – Charlo» boks keshinde eki qazaqstandyq rıngke shyǵady

<p>Qazaqstandyq kásipqoı boksshylar Bek Nurmahanbet (10-0, 8KO) pen Ábilhan Amanqul (4-0, 4KO) Las-Vegasta (AQSh) Saýl &laquo;Kanelo&raquo; Alvares - Djermell Charlo jekpe-jeginiń anderkardynda óner kórsetedi, dep habarlaıdy&nbsp;<a href="https://kaz.inform.kz/" target="_blank" rel="noopener">QazAqparat.</a></p>

B.Nurmaǵanbet jeńilip kórmegen nıgerııalyq Abımbol Osýndaıromen (5-0, 3KO) judyryqtasady. Sýperorta salmaqtaǵy aıqas 6 raýndqa eseptelgen. Al Á.Amanqul amerıkalyq Djoshon Djeımspen (7-0-1, 4 KO) judyryqtasady. Orta salmaqtaǵy bul jekpe-jek te 6 raýndqa josparlanǵan. Kezdesýler astana ýaqytymen 1 qazan, saǵat 03.00-de bastalady.

Kazproboxing málimetine súıensek, keshe qazaqstandyq qos boksshy jekpe-jekteri aldynda salmaq ólsheý rásiminen ótip, qarsylastarymen kóz arbasty.

B.Nurmaǵanbet buǵan deıingi aıqasyn mamyr aıynda ótkizgen edi. Ol ekinshi raýndta meksıkalyq boksshy Arhenıs Espanıýdi (15-2, 14 KO) nokaýtqa jiberdi. Á.Amanqul da sharshy alańǵa mamyr aıynda shyǵyp, meksıkalyq faıter Fabıan Fraýstony (7-8-3, 4 KO) ekinshi raýndta nokaýtpen jeńdi.

Las-Vegastaǵy keshtiń hedlaınerleri – óz salmaq sanatyndaǵy kóshbasshylar Saýl Alvares (59-2-2, 39 KO)pen Djermell Charlo (35-1-1, 19 KO). Kezdesý sýperorta salmaqtaǵy álemniń absolıýtti chempıony ataǵy úshin ótedi.

Sports.kz-tiń jazýynsha, «Habar» arnasy T-Mobile Arena-dan tikeleı kórsetilimdi 1 qazan kúni saǵat 07.00-de bastaıdy.

Bul jekpe-jekte S.Alvares 168 fýntta ózine tıesili barlyq tıtýlyn – WBA Super, WBC, IBF jáne WBO beldikterin báske tigedi.

«Kanelo» sońǵy ret rıngke bıylǵy mamyr aıynda shyqqan edi: Ol tóreshilerdiń biraýyzdy sheshimimen brıtandyq Djon Raıderdi (32-6, 18 KO) jeńdi. Djermell Charloǵa kelsek – 2022 jyldyń mamyrynan jekpe-jek ótkizbegen. Ol kezde D.Charlo onynshy raýndta argentınalyq Braıan Kastanony (17-1-2, 12 KO) nokaýtpen utty.