Altynǵa bergisiz qola: Eldos Smetovke baýyrlary jańa kólik syıǵa tartty

ALMATY. QazAqparat – Tokıo Olımpıadasynyń qola júldegeri Eldos Smetov elge oraldy. Ony áýejaıdan jaqyndary men jankúıerleri ystyq yqylaspen qarsy alyp, dzıýdoshyǵa sý jańa temirtulpardy syıǵa tartty, dep habarlaıdy QazAqparat «Oıan, Qazaqstan!» baǵdarlamasyna silteme jasap.

Eldos Smetovty kútip alý saltanatyna qazaq estradasynyń ánshileri, aıtysker aqyndar jáne Olımpıada júldegeriniń alǵashqy jattyqtyrýshysy da keldi. Shákirtiniń jetistigine shattanǵan jattyqtyrýshy qýanyshtan kózine jas aldy.

«Mine, naǵyz chempıon. Meniń alǵashqy jattyqtyrýshym. Kishkentaı kezimnen meni óz balasyndaı kórip, alaqanyna salyp ósirgen meniń bapkerim», - dedi Eldos Smetov.

El mereıin asqaqtatqan sportshyny kútip alý saltanatynda shashý shashylyp, oǵan jańa avtokólik syıǵa tartyldy.

«Olımpıada óte keremet ótti. Zaldyń bos bolǵany biz úshin yńǵaıysyz boldy. Eń qıyn bolǵan beldesý ol – aqtyq saıysqa joldama beriletin fınaldyq beldesý. Osylaı buıyryp tur eken. Osynyń ózine qýanyshtymyn. Meniń elim, jerim, halqym úshinshi oryndy birinshi oryn retinde qabyldap, meni Olımpıada chempıony retinde kútip aldy», - dedi eki dúrkin Olımpıada júldegeri.