Altynemel ulttyq parkinde taǵy bir qar barysy fototuzaqqa túsip qaldy

ALTYNEMEL. QazAqparat - Qar barysy Altynemel ulttyq parkinde qarasha aıynda taǵy da fototuzaqqa tústi. Bul - ilbistiń atalǵan ulttyq parktegi ekinshi vıdeosy. Qyrkúıek aıynda fototuzaqqa bir barys túskenin eskersek, endi bul parkte sırek kezdesetin osyndaı eki janýar mekendeıdi deýge negiz bar, dep habarlaıdy QazAqparat.

Ekologııa, geologııa jáne tabıǵı resýrstar mınıstrliginiń málimetinshe, Qyzyl kitapqa engen ańnyń sany jyldam azaıyp keledi. Qazaqstanda 120-130, álem boıynsha 7 myńdaı ǵana barys bar.

Ǵylymı dáıekterdiń joqtyǵyna qaramastan, Altynemel ulttyq parkinde barys mekendeıtini qujat júzinde dáleldenip qoıdy.

Aıta keteıik, bul joly fototuzaq basqa taý shatqalyna - shatqal shuńqyrynyń, ıaǵnı barys apanynyń dál qasyna ornatyldy. Vıdeodan barystyń qalaı demalyp, pyryldaǵanyn, aınalany torýyldap júrgenin kórýge bolady.

Qyrkúıektegi barys pen osy jolǵy barystyń júrgen jeri bir-birinen alys ekenin eskersek, bular eki bólek ań bolýy múmkin. Boljamdy naqtylaý úshin ilbisterdiń terisindegi daqtar jiti salystyrylady.

Sırek janýarlardyń foto, vıdeo túsirilimderi BUU Damý baǵdarlamasy ornatqan fototuzaqtar kómegimen alynyp otyr.

Barystyń tabylýyna baılanysty jáne basqa da sırek ushyrasatyn Tıan-Shan aıýy, Túrkistan mysyǵy, Tıan-Shan arqary, tas sýsar, manýl janýarlaryn zertteý úshin Altynemelde jańa ǵylymı-zertteý jumysy men ulttyq parktiń janýarlar popýlıatsııasynyń jaǵdaıyn baqylaý ǵylymı baǵdarlamasy bastalady.