«Altyn tulpar» alaman báıgesi: 10 jasar Aqjol mingen sáıgúlik oza shaýyp, bas júldeni oljalady(FOTO)
"Jasym onda. Báıgede qatty qoryqqan joqpyn. Bul atty burynnan bilemin, ózimniń dosymdaı", - deıdi shabandoz Aqjol.
Bir aıta keterligi, báıgeni kórýge jınalǵan halyq sanynda esep bolmady. Qazaq handyǵynyń 550 jyldyǵyna oraı uıymdastyrylǵan báıge rasymen qazaqtyń at shaptyryp, as berip, dalada dýmandatatyn baıyrǵy saltyn kózge elestetti. Al, ozyq tehnologııalardy oraıymen paıdalanǵan uıymdastyrýshylar báıge ótken jerge eki úlken ekran ornatyp, jarys jolynda ár eki shaqyrym saıyn kamera qoıǵan. Sonyń arqasynda, 12,5 shaqyrym bolatyn ár aınalymda at súıer qaýym qaı tulpardyń oza shaýyp kele jatqanyn anyq kórip otyrdy. Onyń ústine, báıge barysyn bastan-aıaq eki tikushaq tóbeden beınekameraǵa túsirip júrdi.
Al, alaman báıgege kim atyn qosty degenge kelsek, jarys erejesine saı 14 oblys pen Almaty jáne Astana qalalary alamanǵa árqaısysy on tulpar qosa alatyn boldy. Ulttyq sport túrleri qaýymdastyǵynyń prezıdenti Bekbolat Tileýhan atap ótkendeı, «Altyn tulpar» alaman báıgesiniń bıylǵy júlde qory 23 mln. teńgeni quraıdy, sonyń ishinde, bas júlde ıesine 10 mln. teńge beriledi. Barlyǵy, márege alǵash jetken 9 tulpar dıplom men aqshalaı júldege ıe boldy.
"Halqymyzdyń san ǵasyrlyq ulttyq sportyn jańǵyrtqan "Altyn tulpar" respýblıkalyq týrnıri ótken jyly "Nur Otan" partııasynyń qoldaýymen birinshi ret uıymdastyrylǵan edi. Sol dástúr elimizdiń aıtýly merekesi -Qazaq handyǵynyń 550 jyldyǵy aıasynda jalǵasyn taýyp otyr. Elbasy 2050 strategııasynda ulttyq mádenıetimiz ben dástúrimizdi ulylyǵymen qosyp qorǵaýymyz kerek dep atap ótken bolatyn. Saıası doktrınasynda dástúrdi damytýdy basym baǵyt etken "Nur Otan" partııasy ulttyq óner men sportty turaqty qoldap keledi. Jaqynda ǵana, partııanyń demeýimen elorda irgesinde «Teńge ilý» men «Asaý úıretýden» Azııa chempıonaty ótti. Al, alaman jarystyń batyr babamyz - Qabanbaı batyr kesenesiniń janynda ótýi de úlken mánge ıe. Halqymyzdyń birigýi men irgeli el bolýyna Qabanbaı batyrdyń qosqan úlesi zor. Búgin ótip jatqan báıgeniń de basty maqsaty - halqymyzdyń rýhyn kóterý, birligin nyǵaıtý. Sonymen qatar, osy sport túrin ulttyq brendke aınaldyrý. Sol arqyly jas urpaqtyń boıyna ulttyq qundylyqtarǵa degen qurmetti oıatý", - dedi jas júırikterdi qarsy ala otyryp, "Nur Otan" partııasynyń hatshysy Farhat Qýanǵanov.
Birinshi oryn alǵan "Shamal" atty tulpardyń ıesi bolsa búgin balanyń da baǵy janǵan, júıriktiń de baby kelisken kún boldy deıdi qýanyshymen bólise otyryp.
"Báıge boıy tulparym men Aqjol kózge kóringen joq, oza shapqan joq. Ekeýi de salmaqtylyq tanytty. Jalpy, alaman báıge atty da, adamdy da sabyrlyqqa úıretetin báıge. Búgin attyń da, balanyń da baǵy jandy. Jylqy myqty bolý kerek, biraq, ústindegi shabandozy odan da myqty bolý kerek. Kúreń tóbel at pen Aqjol burynnan biriniń syryn biri biledi. Aqjol bul jylqyny ózi sýaryp, ózi jemdep, onyń dosyna aınalǵan desem bolady. "Shamaldyń" úlken jarystarda ozýy - alǵash ret", - deıdi "Shamaldy" baptap ákelgen Esbolat Shyńtasev.
"At súıer qaýym. Óziniń ulttyq dástúrin áspettegen aǵaıyn! At degende arqasy qozǵan aǵaıyn, myna aq kóńilderińizge rahmet! Bir aptada úsh ret báıge alǵan ataqty Óksikbaıdyń "Qozykúreń" deıtin aty bolǵan, sol "Qozykúreńniń" bel balasyndaı búgin Qordaı óńirinen kelip, merekemizdiń árin kirgizgen tulpar men shabandoz balaǵa rahmet. Eldegi tynyshtyqtyń, beıbit kúnniń arqasynda shapqan atymyz báıgeden kelip jatyr. Búgin ulttyq dástúrimiz saltanat qurǵan kún. Keshegi Qozybasyda tý tikken Kereı men Jánibektiń týyndaı baıraǵymyz Astanada jelbirep, arqamyzdy qozdyryp jatyr. 550 jyl emes, 5 myń ǵasyr tarıhy bolatyn Máńgilik elge aınalaıyq", - dedi báıge ıesine 10 mln teńge, tulparyna alty jabý japqan B.Tileýhan.
Sonymen, "Altyn tulpar" alaman báıgesiniń toǵyz júldeli ornyn alǵan shabandozdar men júırikter mynalar:
9-oryn - Asylhan Bekishev, aty "Qasqaldaq", Almaty oblysy, 400 myń teńge;
8-oryn - Dıas Turǵanov, aty "Naızaǵaı", Almaty oblysy, 500 myń teńge;
7-oryn - Nurbolat Aıdarly, aty "Boıtumar", Jambyl oblysy, 700 myń teńge;
6-oryn - Dýman Jansha, aty "Aqqaǵaz", Qaraǵandy oblysy, 800 myń teńge;
5-oryn - Qýatbek Edil, aty "Traktor", Jambyl oblysy, 900 myń teńge;
4-oryn - Erkebulan Ermaǵambetov, aty "Bektory", Qaraǵandy oblysy, 1 mln teńge;
3-oryn - Oljas Qoıshybek, aty "Jannur", Almaty oblysy, 3 mln teńge;
2-oryn - Meıirhan Dálelov, aty "Beıbarys", Pavlodar oblysy, 5 mln teńge;
1-oryn - Aqjol Jumataı, aty "Shamal", Jambyl oblysy, 10 mln teńge.