«Altyn tuǵyr» ádebı júldesi úshin baıqaý jarııalandy

ASTANA. QazAqparat - QR Táýelsizdiginiń 25 jyldyǵyna oraı «Aýyl» partııasy men «Qazkontent» AQ-nyń «Ádebıet portaly» jas aqyn-jazýshylar arasynda «Aýylym - altyn tuǵyrym» atty ádebı onlaın-baıqaý uıymdastyryp otyr.

Baıqaýdyń basty maqsaty - jas talapkerler arasynda aýyldyń rýhanı ómirin, tynys-tirshiligin, aýylda júrip jatqan áleýmettik-ekonomıkalyq protsesterdi sýretteý, aýyl qundylyqtaryn nasıhattaý, jas qalamgerler, aqyndar men jazýshylardy qoldaý jáne olardyń shyǵarmashylyǵyn damytý.

Baıqaýǵa 14 pen 45 jas aralyǵyndaǵy kez kelgen qalamger óz shyǵarmasyn usyna alady. Úmitkerlerdiń shyǵarmalary men jeke málimetteri «Ádebıet portalynda» kórsetiledi jáne olar «Shyǵarmany engizý» batyrmasy arqyly ornalastyrylady. Árbir qatysýshynyń jeke paraqshasynda jarııalanǵan shyǵarmalarǵa portalǵa tirkelgen qoldanýshylar juldyzshalar arqyly daýys bere alady. Konkýrs sońynda ár nomınatsııa boıynsha komıssııa músheleri qatysýshylardy jeke-jeke baǵalaıdy.

Baıqaýǵa qatysý úshin shyǵarmalar onlaın túrinde «Ádebıet portalynda» 2016 jylǵy 1 jeltoqsanǵa deıin ornalastyrylýy tıis. Kórkemdik deńgeıi tómen shyǵarmalar qabyldanbaıdy. Usynylǵan shyǵarmalar buǵan deıin esh jerde jarııalanbaǵan bolýy shart. Úmitker usynatyn eńbegin portalda onlaın arqyly jarııalaı alady, sonymen qatar «Ádebıet portalynyń» elektrondy poshtasy: [e-mail]-ǵa  tikeleı joldaı alady.

Aıta keteıik, baıqaýǵa shyǵarmalar úsh atalym boıynsha: proza, poezııa, dramatýrgııa janrlary boıynsha qabyldanady. «AÝYL taqyrybyna arnalǵan úzdik proza» (esse, áńgime, povest) atalymy boıynsha 1-orynǵa 500 myń teńge, 2-orynǵa 300 myń teńge, 3-orynǵa 200 myń teńge beriledi. Qalǵan eki atalym, ıaǵnı «AÝYL taqyrybyna arnalǵan úzdik poezııa» (óleń, ballada, poema) men «AÝYL taqyrybyna arnalǵan úzdik dramatýrgııa» atalymdary boıynsha da dál osyndaı júlde qory bekitilgen. Sondaı-aq, úsh nomınatsııa boıynsha birinshi oryn alǵan jeńimpazdardyń arasyndaǵy úzdik qalamgerge «ALTYN TUǴYR» ádebı júldesi tabys etiletin bolady.

Baıqaýǵa qatysýshylardyń shyǵarmalaryn proza boıynsha Rahymjan Otarbaev, Marhabat Baıǵut jáne Erbol Beıilhan, poezııada Talǵat Eshenuly, Erqoja Álqojauly, Baýyrjan Qaraǵyzuly jáne dramatýrgııa boıynsha Jabal Erǵalıev, Joltaı Álmash, Roza Muqanova syndy qazaq ádebıetiniń bedeldi ókilderi syn tezinen ótkizedi.

Konkýrs qorytyndysy 2016 jyly 3 jeltoqsanda shyǵarylady. Jeńimpazdardy marapattaý 2016 jyly 7 jeltoqsanda ótedi.