«Altyn Tobylǵy» ádebı baıqaýynyń sharttary men erejeleri túsindirildi
Tórtinshi ret ótkizilip otyrǵan bul baıqaýdyń negizgi maqsaty - qazirgi zamanǵy qazaqstandyq ádebıetti damytý, nasıhattaý, sol arqyly kásibı qalamgerlerdiń jańa býynyn, jańa esimderdi qalyptastyrý.
«Bul baıqaý elimizdiń jas aqyn-jazýshylarynyń atyn shyǵaryp, olardy qarjylaı qoldaý arqyly shyǵarmashylyqtaryn shyńdaýǵa zor stımýl beredi degen senimdemin. Ádettegishe, bıyl da usynylǵan týyndylar mazmuny men ıdeıa ereksheligine, biregeıligine, kórkemdik qurylymyna baılanysty baǵalanady. Qabyldanǵan jumystardy elimizge tanymal mádenıet qaıratkerleri men aqyn-jazýshylardan quralǵan Qazylar alqasy saraptaıtyn bolady. Shyǵarma laqap atpen qabyldanady. Baǵalaý kezinde qazylar alqasy týyndy avtorynyń esimin bilmeıtindikten, baıqaý barynsha ádil ótedi», - dedi Elbasy qory atqarýshy dırektorynyń orynbasary Sultan Aıtjanov Ortalyq kommýnıkatsııalar qyzmetinde ótken baspasóz máslıhatynda.
Baıqaýǵa 18-35 jas aralyǵyndaǵy azamattar qatysa alady. Usynylǵan týyndylar buǵan deıin esh jerde jarııalanbaǵan bolýy tıis.
«Altyn Tobylǵy» syılyǵy «Úzdik proza», «Úzdik poezııa», «Úzdik dramatýrgııa», «Balalarǵa arnalǵan úzdik shyǵarma» sııaqty tórt atalym boıynsha taǵaıyndalady. Árbir nomınatsııa jeńimpazyna 1 mıllıon teńgeden syıaqy beriledi. Sonymen qatar, «Astananyń 20 jyldyǵyna arnalǵan úzdik shyǵarma» atty arnaıy taqyryptyq nomınatsııa boıynsha syıaqy kólemi 1,5 mıllıon teńgeni quraıdy.
Baıqaýǵa alǵashqy jyly 120 jumys jiberilse, 2016 jyly - 110, 2017 jyly - 132 ótinim kelip túsken. Byltyr eń úzdik laýreattardyń shyǵarmalary arnaıy basylymmen kitap bolyp shyqty.
Ótinimder 2018 jylǵy 1 shilde men 1 qarasha aralyǵynda qabyldanady. Jeńimpazdar esimi 2018 jyly jeltoqsan aıynda jarııalanady. Tolyq aqparatpen Tuńǵysh Prezıdent qorynyń resmı saıtynan tanysýǵa bolady.
Nurjaýǵan Muqanova