Altyn Ordanyń 750 jyldyǵy: Áýlıekól qalashyǵy qalpyna keltiriledi

PAVLODAR. QazAqparat - Altyn Ordanyń 750 jyldyǵyn atap ótý aıasynda Pavlodar memlekettik pedagogıkalyq ınstıtýyna qarasty tanymal arheolog Tımýr Smaǵulov jetekshilik etetin Margulan Centre Áýlıekól qalashyǵynda kesenelerdi qalypqa keltirý jumystaryn júrgizedi, dep habarlaıdy pavlodarnews.kz.

Bul týraly óńirlik kommýnıkatsııalar qyzmetinde ótken baspasóz máslıhatynda oblystyq mádenıet, tilderdi damytý jáne arhıv isteri basqarmasynyń basshysy Ernur Dáýenov málim etti. - Joshy han tusynda Altyn Orda dáýiriniń negizgi ortalyǵynyń biri Ertis óńirinde boldy degen tujyrym bar, - deıdi Ernur Dáýenov. - Ol Áýlıekól jaǵasynda ornalasqan jáne sol jerde erekshe saqtalǵan qalanyń qaldyqtary bar. Osyǵan baılanysty mádenıet basqarmasymen 20 mln teńge qarajat bólinip otyr. Sol qalanyń negizgi beınesin qalpyna keltirýge tyrysamyz. Nátıjesinde sol jerde áýlıe Isabek Ishannyń kesenesimen birge týrıstik ortalyq, kıeli oryn paıda bolady degen oıdamyz. Bul arheologııalyq qazba jumystar buryn da júrgizilgen, biraq bıyl ǵylymı turǵydan júıeli túrde qarajattyń bólinýimen uıymdastyrylady.

Vedomstvo basshysynyń aıtýynsha, Áýlıekól qalashyǵyn qalpyna keltirý boıynsha qazba jumystary maýsym aıynda bastalyp, tamyz aıynyń sońyna deıin júrgiziledi. Qyrkúıekte qorytyndysy shyǵarylyp, qarasha-qazan aılarynda halyqaralyq konferentsııa ótedi. Pavlodar memlekettik pedagogıkalyq ýnıversıtetimen «Qazaqstan tarıhyndaǵy «Ýlýg Ýlýs (Altyn Orda)» vıdeodáris daıyndaý, sondaı-aq «Uly dala murasy» jobasy aıasynda bilim mekemelerinde mýzeıler ashý josparlanyp otyr.

Altyn Ordanyń 750 jyldyǵyn atap ótýge arnalǵan oblystyq jospar boıynsha qalalar men aýdandarda barlyǵy 100-ge jýyq ártúrli is-shara ótedi. Onyń ishinde kórmeler men tanymdyq saǵattar, sýretter baıqaýy bar.

Aıta keterligi, orta ǵasyrlyq Áýlıekól qalashyǵy saıası-mádenı jáne ákimshilik-ekonomıkalyq ortalyq bolǵan. Halyq arasynda bul óńir Aqkól-Jaıylma degen atpen belgili.