Altyn Orda eskertkishterin aralaıtyn ekspedıtsııa jolǵa attandy

QARAǴANDY. QazAqparat - Qaraǵandylyqtar «Ulytaý – Altyn Ordanyń besigi» atty ǵylymı-tanymdyq ekspedıtsııaǵa attandy. Onyń quramyna jas tarıhshylar, geograftar, ólketanýshylar, stýdentter, jýrnalıst-blogerler, sýretshiler jáne túsirý toby kirdi, dep habarlaıdy QazAqparat tilshisi.

Oblystyq tarıhı-ólketaný murajaıynda ekspedıtsııaǵa qatysýshylardy saparǵa shyǵaryp salý rásimi ótti.

«At basyn tireıtin alǵashqy tarıhı nysan - Bolǵan ana kesenesi. Qurylys 13-14 ǵasyrlarǵa jatady, bul Altyn Orda kezeńi. Bes kún ishinde ekspedıtsııa músheleri Ulytaý aýdanynyń barlyq kesenelerin aralaıdy. Elbasy atap ótkendeı, biz óz tarıhymyzdy bilip, ony oqyp, bolashaq urpaqqa berýimiz kerek. Sondyqtan ekspedıtsııaǵa qatysý úshin biz jastardy tańdap aldyq», - dep atap ótti oblystyq tarıhı-ólketaný murajaıynyń dırektory Erjan Nurmaǵanbetov.

Ekspedıtsııa Jastar jyly aıasynda uıymdastyryldy. Altyn Ordanyń 750 jyldyǵyna arnalǵan joba «Rýhanı jańǵyrý» baǵdarlamasy boıynsha júzege asyrylýda. Ol sondaı-aq Tuńǵysh Prezıdenttiń «Uly dalanyń jeti qyry» maqalasynda alǵa qoıylǵan mindetterdi júzege asyrýǵa baǵyttalǵan.

Ekspedıtsııanyń bastamashylary Qaraǵandy oblysynyń mádenıet, muraǵattar jáne qujattama basqarmasy men oblystyq tarıhı-ólketaný murajaıy boldy.

«Ekspedıtsııa Altyn Orda tarıhyn odan ári zertteýge yqpal etedi. Bizdiń elimiz úshin bul tek mádenı jaǵynan ǵana emes, saıası jáne ekonomıkalyq turǵydan da zor mańyzǵa ıe», - deıdi «Rýhanı jańǵyrý» jobalaý keńsesiniń bas menedjeri Serik Sanaýbaev.

Ekspedıtsııa qatysýshylary Altyn Orda kezeńiniń eskertkishterin zerdeleıdi. Jolaýshylar Han Ordasy qalashyǵyna, sodan keıin Joshy han, Alasha han, Aıaqqamyr, Bolǵan Ana, Belen Ana, Qulan Ana keseneleri jáne basqa da qasıetti oryndarǵa barady. Qatysýshylar Altynshoqy shyńyna, Basqamyr jáne Aıaqqamyr taýlaryna kóterilip, Terekti áýlıe arheologııalyq keshenin aralaıdy.

«Men sýretshi retinde bárin tirkep, sýret salamyn. Barlyq qajetti materıaldardy ózimmen ala shyqtym. Ekspedıtsııa aıaqtalǵannan keıin Altyn Ordanyń 750 jyldyǵyna arnalǵan úlken kartına jasaýdy josparlap otyrmyn», - deıdi sýretshi Mádıhan Qalmahanov.

Uıymdastyrýshylar sapar qorytyndysy boıynsha qysqa metrajdy fılm jasap, fotoalbom, kartalar men býkletter shyǵarý josparlanyp otyrǵanyn habarlady.

Esterińizge sala keteıik, QR Prezıdenti Qasym-Jomart Toqaev Ulytaýda ótken halyqaralyq týrıstik forýmda aýdan halyqaralyq deńgeıdegi etnografııalyq týrızmniń ortalyǵyna aınalýy tıis ekendigin málimdedi.

«Bul úshin qajetti jumystar Altyn Ordanyń 750 jyldyǵyn merekeleý aıasynda bastalýy tıis», - dep atap ótti Memleket basshysy.