«Altyn orda» bazarynda 1,6 mlrd teńge kóleminde zańbuzýshylyq anyqtaldy

NUR-SULTAN. QazAqparat – Almaty qalasyndaǵy «Altyn orda» bazarynyń qyzmetin tekserý barysynda 1 mlrd. 600 mln. teńge kólemindegi zańbuzýshylyq tirkeldi. Bul týraly QR Saýda jáne ıntegratsııa mınıstrligi saýda komıteti tóraǵasynyń orynbasary Aıdar Ábildabekov málim etti, dep habarlaıdy QazAqparat tilshisi.

«Altyn orda» - elimiz boıynsha ǵana emes, Ortalyq Azııadaǵy eń iri bazarlardyń biri. Aýmaǵy - 28-29 gektar. Ózderińiz biletindeı, Memleket basshysynyń tikeleı tapsyrmasyna sáıkes, Bas prokýratýra elimizdegi saýda oryndary men bazarlardyń qyzmetin tekserýdi mindettedi. Osy oraıda, barlyq óńirde arnaıy top quryldy. Onyń quramyna jergilikti ákimdik, salyq, saýda departamenti, básekelestikti qorǵaý jáne damý departamenti men basqa da quzyrly organ ókilderi kirdi. Osylaısha, «Altyn orda» bazarynyń qyzmetin 70 adamnan turatyn top tekserdi. Tekserý barysynda 1 mlrd. 600 mln. teńge kólemindegi kemshilik tabyldy», - dedi Aıdar Ábildabekov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, tekserý qorytyndysy áli tolyq shyqpaǵan.

«Aıtar bolsaq, keıbir nysandar zańsyz salynǵan. Atalǵan bazardy tekserýdiń tolyq qorytyndysy bizge áli kelmedi. Óıtkeni, jumys aýqymdy. Meniń aıtyp otyrǵanym - alǵashqy derekter», - deıdi ol.

Mınıstrlik ókili keltirgen statıstıkaǵa sáıkes, búginde elimizde 761 bazar bar, onyń 515-de azyq-túlik satylady.

Buǵan deıin habarlaǵanymyzdaı, elimizde keıbir iri bólshek saýda bazarlary naryq baǵasymen sanaspaıdy.

Sondaı-aq, Qazaqstanda bazar ıelerine jeke jaýapkershilik júktelmek.