«Altyn orda» bazary mańyndaǵy jol qashan paıdalanýǵa beriledi
«QazAvtoJol» ulttyq kompanııasy AQ «Ortalyq-Ońtústik» baǵytyndaǵy Nur-Sultan – Qaraǵandy – Balqash - Prıozersk – Býrylbaıtal - Shý – Almaty aımaqtaryndaǵy joldardyń salyný barysyn tanystyryp, kórsetý maqsatynda baspasóz týryn uıymdastyrdy.
Sonyń barysynda Almaty qalasyndaǵy «Altyn orda» bazary mańynda kópir jol qurylysynyń jumysy tanystyryldy.
«Altyn orda» bazary mańyndaǵy jolaıyryqta qazirgi ýaqytta beton-tsementteý jumystary júrip jatyr. Bul joldyń almatylyqtar úshin mańyzy zor, óıtkeni bul jol qaladaǵy birneshe iri saýda ortalyqtaryna alyp barady. Jańa josparǵa sáıkes bul jol jolaǵy 8-den 10-ǵa artady. Jáne bastysy qaýipsizdikke asa mán beriledi. Sebebi bul jolaıyryq toǵyz joldyń toraby, sondyqtan jol-kólik oqıǵasy jáne keptelis máselesi bar. Osy oraıda salynyp jatqan jańa avtomobıl joly boıynda qosymsha jol júrý erejeleri engiziletin bolady. Estakadanyń uzyndyǵy 600 metrdi quraıdy. Qurylys josparyna sáıkes, jyldyń sońyna deıin paıdalanýǵa beriledi» - dedi «QazAvtoJol» ulttyq kompanııasy AQ Almaty oblystyq fılıalynyń dırektorynyń mindetin atqarýshy Bolatbek Aıtbaev.
Onyń aıtýynsha, ótken jyly pandemııaǵa baılanysty qurylys jumysy toqtap turdy.
«Estakada qurylysyn bıyl mamyr aıynda bastadyq. Avtomobıl joly 2 kópirden jáne 4 jolaqtan turady. Jol salýmen 250 adam aınalysyp jatyr, degenmen jumys komandasy áli de jasaqtalý ústinde. Kólik jolynyń uzyndyǵy 4 shaqyrymǵa jýyqty qurasa, kópirdegi joldyń uzyndyǵy 600 metrdi quraıdy. Bul avtokólik joly Almatynyń batys aýmaǵynda ornalasqan ıaǵnı qalany Shymkent qalasymen jáne Ózbekstan shekarasymen baılanystyratyn bolady», - dedi atalǵan jobanyń jetekshisi Smet Abılov.
Buǵan deıin habarlaǵanymyzdaı, Shamalǵanda temirjol apatynan soń jańa kópir salynyp jatyr.