Altyn, kómir, temir jáne mys ken oryndary memleket menshigine qaıtaryldy

ASTANA. QazAqparat - Qazaqstan Premer-Mınıstriniń birinshi orynbasary Roman Sklıar qatty paıdaly qazbalar men kómirsýtek shıkizatynyń ken oryndaryn tekserý máselesi jóninde keńes ótkizdi, dep habarlaıdy QazAqparat QR Úkimetiniń baspasóz qyzmetine silteme jasap.

Úkimet jer qoınaýyn paıdalanýshylarǵa berilgen kelisimsharttar men lıtsenzııalardy qaıta qaraý boıynsha jumys júrgizip jatyr. Taldaý barysynda 2022 jyly ýákiletti organdar qatty paıdaly qazbalar boıynsha 115 kelisimshart pen 198 lıtsenzııany, sondaı-aq kómirsýtek shıkizaty boıynsha 12 kelisimshartty buzdy.

Nátıjesinde memlekettik qorǵa altyn, kómir, temir, mys, boksıt, polımetall jáne t.b. ken oryndary qaıtaryldy, olar keıinnen strategııalyq ınvestorlarǵa berý úshin aýktsıonǵa shyǵarylady.

2022 jyly ótkizilgen aýktsıondardyń qorytyndysy boıynsha bıýdjetke 26 mlrd teńge somasyna qol qoıý bonýsy tólendi jáne kómirsýtek shıkizaty boıynsha geologııalyq barlaýǵa 50 mlrd teńgeden astam ınvestıtsııa málimdeldi.

Jer qoınaýyn paıdalaný quqyǵyn usynýǵa arnalǵan aýktsıonǵa barlyq múddeli ınvestor qatysa alady. Aýktsıondardy ótkizý týraly aqparat mindetti túrde respýblıkalyq baspa basylymdarynda jáne memlekettik organdardyń ınternet-resýrstarynda jarııalanady.

Sonymen qatar ýákiletti organdar qarjylyq mindettemelerdi buzǵan jer qoınaýyn paıdalanýshylarǵa aıyppul sanktsııalaryn qoldaný boıynsha jumys júrgizip jatyr.

2022 jyly memleket kirisine qatty paıdaly qazbalar boıynsha 331 mln teńge mólsherinde turaqsyzdyq aıyby óndirildi, sondaı-aq kómirsýtek shıkizaty salasyndaǵy 9 kelisimshart boıynsha 1,8 mlrd teńgege bereshek óteldi.