«Altyn Emelde» zamanaýı vızıt-ortalyq paıda bolady

NUR-SULTAN. QazAqparat – «Altyn Emel» memlekettik ulttyq tabıǵı parkinde zamanaýı vızıt-ortalyq paıda bolady, dep habarlaıdy QazAqparat Ekologııa mınıstrligine silteme jasap.

Nysan qurylysy QR Ekologııa, geologııa jáne tabıǵı resýrstar mınıstri Maǵzum Myrzaǵalıevtiń ınvestorlarmen kezdesýinde talqylandy.

Sondaı-aq park aýmaǵynda glempıngter, kempıngter, tamashalaý alańdaryn, demalýǵa arnalǵan oryn jáne avtoturaq paıda bolady. Ekotýrızmdi damytý Tujyrymdamasyna sáıkes ulttyq parkte qaýipsiz týrıstik marshrýttar men soqpaqtardy damytýǵa, týrıstik obektilerdi kúrdeli qurylystarsyz ornalastyrýǵa erekshe mán beriledi.

Maǵzum Myrzaǵalıev «Aıǵaıqumnan» 1,5 km qashyqtyqta ornalasqan Sh.Ýálıhanov bulaǵyna da bardy. Bulaq qazaqtyń uly ǵalymy, etnografy jáne zertteýshisi Shoqan Ýálıhanovtyń esimimen atalǵan.

Sapar sońynda EGTRM ókilderi Іle-Alataý MUTP-daǵy «Aıýsaı» vızıt-ortalyǵyna bardy. Atalǵan nysandy ekotýrızmdi damytý jobasy aıasynda «Týranga Grýpp» JShS salǵan bolatyn. Qazir munda glempıngter, kempıngter sany artyp keledi. Sondaı-aq mınıstr ekobelsendi, eriktilermen kezdesip, salany damytýǵa qatysty máselelerdi talqylady.

Aıta keteıik, 2020 jyly Іle-Alataý MUTP men kompanııa arasynda jalpy aýdany 35 ga bolatyn park ýchaskelerin uzaq merzimdi paıdalaný sharty jasaldy, jobaǵa 4 jyl ishinde 12 mlrd.teńgege deıin ınvestıtsııalaý josparlanýda. 7 vızıt-ortalyq, 155 km jaıaý jol, 2 kempıng, etnoaýyl, Kerýen jáne 10 glempıng salynady.