«Altyn-Emel» parkindegi qulan sany 3 myńnan asty

ASTANA. QazAqparat - «Altyn-Emel» ulttyq tabıǵı parkinde qulan sany 3500-den asty, dep habarlaıdy QazAqparat Ekologııa mınıstrligine silteme jasap.

Jyl saıyn aqpan aıynyń ortasynda «Altyn-Emel» ulttyq parkinde Qyzyl kitapqa engen tuıaqtylarǵa sanaq jumystary júrgiziledi. Bıylǵy jylǵy sanaq jumystary Orman sharýashylyǵy jáne janýarlar dúnıesi komıtetiniń basshylyǵy jáne basqa da tıisti mamandar qatysty.

«Qaraquıryq, qulan jáne arqardy sanaý úshin keminde eki kún ketedi. Atalǵan jumystar tańnyń atysymen jabaıy ańdar jaıylymǵa shyqqannan bastalady. Ańdardy sanaý atpen jáne avtokólikpen júrgiziledi. «Altyn-emel» ulttyq tabıǵı parki aýmaǵyna 1982 jyly Barsakelmes aralynan ákelingen 27 Túrkimen qulany Jetisý óńirine jatsynbaı jersinip, búginde olardyń sany 3500-den asqan. Sanaq nátıjesi boıynsha qaraquıryq sany 5360, al arqar sany 179 basty qurady. Byltyrǵy jylmen salystyrǵanda ósim baıqalady. Esterińizge sala keteıik, mundaı sanaq barysynda 20% aýytqýshylyq bolýy múmkin», -delingen habarlamada.

Búginde ulttyq park qyzmetkerleri sany kóbeıgen Túrkimen qulanyn, basqa da erekshe qorǵalatyn tabıǵı aýmaq terrıtorııalaryna jiberip, jersindirýdi qolǵa alǵan. Máselen, byltyrǵy jyly «Іle-Balqash» rezervaty aýmaǵyna 60 bas, «Altyn dala» qoryǵyna 4 bas qulan jiberilgen. Atalǵan EQTA aýmaqtaryna jalpy sany 240 qulan jersindirý josparda bar.

Foto: altyn-emel.kz