Altyn belgi mektep reıtıngisine áser etpeıdi – BǴM

NUR-SULTAN. QazAqparat – «Altyn belgi» tósbelgisi mekteptiń bilim deńgeıine esh áser etpeıdi. Bul týraly QR bilim jáne ǵylym vıtse-mınıstri Sholpan Karınova málim etti, dep habarlaıdy QazAqparat tilshisi.

Búgin QR Bilim jáne ǵylym mınıstrliginde «Altyn belgi» tósbelgisine úmitker bolý jáne emtıhan tapsyrý taqyrybyna arnalǵan tikeleı efır ótti.

Efır barysynda «Altyn belgi» mektep reıtıngisine áser ete me? Sondaı-aq, «Eger «Altyn belgige» úmitker oqýshy tómen baǵa alsa, onda bilim bergen muǵalimniń sanaty tómendetiledi» degen áńgime tarap jatyr. Bul ras pa?» - degen saýal qoıyldy.

«Saýalda aıtylǵan dúnıe shyndyqqa janaspaıdy. Ondaı tártip, ereje joq. «Altyn belgi» mektep reıtıngisine áser etpeıdi. Atalǵan tósbelgige úmitker bolý jáne ıelený tek qana oqýshynyń bilim kórsetkishine baılanysty. Oqýshy úmitti aqtamaǵan jaǵdaıda muǵalimge eshqandaı talap, mindet qoıylmaıdy. Mınıstrlikte ondaı qujat joq», - dep jaýap berdi Sholpan Karınova.

Vıtse-mınıstrdiń aıtýynsha, muǵalimderge sanat berýdiń óz talaby men mindeti bar.

«Árıne, muǵalimniń sanaty ósken saıyn, onyń bilim berý protsesin uıymdastyrýyna talap ta arta túsedi. Attestattaý kezinde muǵalimniń jeke jetistikterimen qatar, oqýshylarynyń da jetistigi esepke alynady. Biraq, másele tek «Altyn belgige» qatysty emes», - deıdi ol.

Aıta keteıik, bıyl 7500 oqýshy «Altyn belgige» úmitker atanyp otyr.

Sondaı-aq, «Altyn belgi» úmitkerleri emtıhandy jańa talappen tapsyrady .