«Altyn adam» Ulttyq mýzeıdiń betke ustar jádigeri bolady - Memleket basshysy

ASTANA. QazAqparat - Qazaqstan Respýblıkasy Ulttyq mýzeıiniń ashylýymen «Qazaq eli» zańǵar sáýlettik keshenin qurý sharalary aıaqtalady. Búgin elorda kúni qarsańynda atalǵan mýzeıdiń resmı ashylý rásimi barysynda Elbasy Nursultan Nazarbaev osylaı málim etti.

«Táýelsizdik saraıy, aspanǵa umtylǵan «Qazaq eli» stellasy, Beıbitshilik pen kelisim saraıy, «Haziret Sultan» meshiti men Qazaq ulttyq óner ýnıversıteti, sondaı-aq búgingi ashylyp otyrǵan Ulttyq mýzeı - bul bizdiń halqymyzdyń máńgilik qundylyǵynyń sáýlettik kórinisi», - dedi Memleket basshysy. Elbasynyń sózine qaraǵanda, Ulttyq mýzeı ǵımaratynda sáýletshiler ótkenniń tereń sımvolızmin, halqymyzdyń búgini men bolashaqqa umtylysyn aıqyn beıneledi. «Qazaqstan tarıhyn keńinen nasıhattaý, bizdiń elimiz týraly tereń bilimdi taratý onyń basty maqsaty bolady. Osy oraıda Qazaqstan táýelsizdiginiń eń jarqyn sımvoldarynyń birine aınalǵan álemge tanymal «Altyn adam» artefaktisi mýzeıdiń betke ustar jádigeri bolatynyna kúmándanbaımyn»,- dedi N.Nazarbaev. Memleket basshysy Ulttyq mýzeıdegi Táýelsizdik kezeńine arnalǵan zal keńinen tanymal bolatynyna senimdi ekenin atap ótti. «Ulttyq mýzeı ǵylymı, rýhanı ortalyqqa aınalady, bizdiń qazaqstandyq joldyń barlyq jetistikterin barshaǵa pash etedi»,- dedi Prezıdent.