«Altyn adam» túpnusqasy qaıda saqtaýly tur

ASTANA. QazAqparat – Ulttyq mýzeıde kelýshilerdiń nazaryna «Altyn adam» tarıhı jádigeriniń túpnusqasy usynyla ma? Atalǵan saýalǵa jaýap alý maqsatynda QazAqparat tilshisi Ulttyq mýzeıge resmı saýal joldaǵan edi.

«Altyn adam» jádigeriniń túpnusqasy tabylǵanǵa deıin jer astynda birneshe ǵasyr jatqandyqtan, saqtalý kúıine baılanysty jartysy mýzeı zaldarynda kórmege qoıylyp, jartysy mýzeıdiń arnaıy qorynda saqtaýly. Túpnusqanyń kórmege qoıylǵan bóligin, ıaǵnı saq patshasy saýytynyń ań stılinde jasalǵan elementterin, áshekeı buıymdaryn №1 «Uly Dalanyń ejelgi óneri jáne tehnologııalary» zalynda (Altyn zal) tamashalaýǵa bolady», - delingen saýal jaýabynda.

Málimette aıtylǵandaı, «Altyn adam» túpnusqasyna rekonstrýktsııa jasalǵan.

«Al zaldyń tórindegi sán-saltanaty jarasqan «Altyn adam» eksponaty – ǵylymı rekonstrýktsııa. Arheologııalyq sensatsııaǵa aınalǵan eksponatty halyqqa kórsetý maqsatynda ǵylymı keńestiń sheshimimen túpnusqanyń rekonstrýktsııasy jasaldy. Alǵashqy nusqasyn Kemel Aqyshev bastaǵan ǵalymdar jasap, «Altyn adamnyń» kıimin, áshekeı buıymdaryn qalpyna keltirgen edi. Qazirgi tańda Ulttyq mýzeıde turǵan «Altyn adam» rekonstrýktsııasynyń avtory, qalpyna keltirýshi, sýretshi Qyrym Altynbekov», - degen túsinikteme berildi.

Ulttyq mýzeı sondaı-aq atalǵan jádigerdiń urlanǵany týraly qaýesetti joqqa shyǵarǵan bolatyn.