«Altyn adam» Ankaradaǵy kórmege qoıyldy
Atalǵan kórme «Altyn adamnyń álem mýzeılerine sherýi» halyqaralyq kórme jobasy aıasynda 12 qyrkúıekten 12 qazanǵa deıin jalǵasady. Kórmege QR Ulttyq mýzeıiniń qorlarynan barlyǵy 207 jádiger usynyldy.
«Ankara qalasynda uıymdastyrylǵan búgingi kórmeniń maqsaty - Eýrazııanyń uly dala beldeýinde kóne temir dáýirinen qazirgi zamanǵa deıingi qalyptasqan tarıhı-mádenı baýyrlas Túrkııa eline tanystyrý bolyp tabylady», - dedi QR Ulttyq mýzeıiniń dırektory Arystanbek Muhamedıuly sharanyń ashylý rásiminde.
Onyń aıtýynsha, Túrkııa jurtshylyǵynyń nazaryna usynylǵan «Altyn adam» jıyrmaǵa jýyq memlekettegi murajaılarǵa qoıylady.
«Qazaqstan álemdik qaýymdastyqty ózindik kóshpeli órkenıetimen jáne tarıhymen erekshe qyzyqtyrady. Qazirgi ýaqytta elimizde QR Tuńǵysh Prezıdenti Elbasy N.Á. Nazarbaevtyń «Rýhanı jańǵyrý», «Uly dalanyń jeti qyry» baǵdarlamalarynyń aıasynda mádenıet pen óner salasynda kóptegen jumystar atqarylýda. Sonyń biri jáne biregeıi ózderińiz kýá bolyp otyrǵan «Altyn adamnyń álem mýzeılerine sherýi» halyqaralyq jobasy. QR Mádenıet jáne sport mınıstrliginiń qoldaýymen QR Ulttyq mýzeıi júzege asyryp otyrǵan bul joba aıasynda Qazaqstan táýelsizdiginiń sımvolyna aınalǵan Altyn adam Eýropa, Azııa jáne ózge de jıyrmaǵa jýyq memlekettiń nazaryna usynylmaq», - dedi Arystanbek Muhamedıuly.
Sonymen qatar, A.Muhamedıuly kórmeni uıymdastyrýǵa kómek kórsetken Túrkııanyń Mádenıet jáne sport mınıstrligine, Túrkııa Respýblıkasyndaǵy Qazaqstannyń elshiligine, Halyqaralyq túrki mádenıeti uıymynyń ujymyna alǵys bildirdi.
Sharanyń ashylý saltanatyna Qazaqstan Respýblıkasynyń Túrkııa Respýblıkasyndaǵy Tótenshe jáne ókiletti Elshisi Abzal Saparbekuly, Mýzeıler men mádenı eskertkishterdiń Bas dırektory Gokhan ıAzgy, TÚRKSOI Bas hatshysy Dúısen Qaseıinov qatysty.