«Alty jyl arpalysqan áke» - baspasózge sholý
***
Búgin «Egemen Qazaqstan» gazeti elimizdiń bas múftıi Erjan qazy Malǵajyulynyń qasıetti Ramazan aıy qarsańynda qazaqstandyqtarǵa arnaǵan úndeýin jarııalap otyr. «Barshamyzdy qasıetti ramazan aıyna aman-esen jetkizgen Alla Taǵalaǵa sansyz shúkirler bolsyn. Kúndelikti tirshilik qamymen júrgen pendeniń júregine bul aıda ıman nury quıylady. Bıyl maýsym-shilde aılaryna tuspa-tus kelgen Ramazanda aýyz bekitýge kúnniń ystyǵy kedergi keltirmeıdi dep senemiz», - degen Qazaqstan Musylmandary Dinı basqarmasynyń tóraǵasy, bas múftı E.Malǵajyuly óz lebizinde. Bas múftıdiń lebizin tolyqtaı «Egemen Qazaqstan» gazetiniń búgingi sanyndaǵy «Raqym aıy - berekeli aı» atty materıaldan oqı alasyzdar.
Bas basylym sondaı-aq dárigerlerdiń biliksizdiginen kóz jumǵan qyzynyń ólimine kináli adamdardy jazalaımyn dep alty jyl ýaqytyn sarp etken qamkóńil áke týraly jazady. Oqıǵa Qostanaı oblysy Arqalyq qalasynda bolǵan. Temirbek Omarov baýyr eti balasynyń ólimine qatysy bar dárigerler men olarǵa qatysty qozǵalǵan qylmystyq isti ilgerletýge tıisti organdardy alty jyl arpalyssa da jaýapqa tartý múmkin bolmaǵan soń, «Egemen Qazaqstan» gazetine hat jazǵan. 2010 jyldyń sońynda aýyrǵan balasyn Arqalyq qalasy týberkýlezge qarsy dıspanserdiń dárigeri G.Qoıshyǵulovaǵa aparǵanda, T.Omarovqa qyzdy emhanaǵa kórsetý kerektigin aıtyp, shyǵaryp salady. Emhana basqa dárigerge, ol dáriger kelesi dárigerge silteı berip, T.Omarovtyń qyzy Gaýhardyń aýrýy ábden asqynǵan. Dıagnoz durys qoıylmaǵandyqtan, Gaýharǵa tipti operatsııa da jasaıdy eken. Dárigerler tek 2010 jyldyń 8 jeltoqsanynda bala týberkýlezge shaldyqqanyn anyqtaǵan. Kóp ýaqyt joǵaltqan ári teris dıagnoz boıynsha emdelgen balanyń ómirine arasha túsý múmkin bolmaı, 2010 jyldyń 11 jeltoqsanynda Gaýhar Omarova kóz jumǵan. Týberkýlez aýrýy emdeletinin eskersek, bul jerde balaǵa durys dıagnoz qoımaı, tipti, ony tolyq zertteýden ótkizbegen dárigerlerdiń kinási anyq baıqalady. Endi mine, qyzynyń sýretin qushaqtap qalǵan áke dárigerlerdi jazalaı almaı álek. Bul týraly tolyǵyraq «Egemen Qazaqstan» gazetindegi «Alty jyl arpalysqan áke» atty maqaladan oqı alasyzdar.
***
«Aıqyn» gazetiniń habarlaýynsha, Almatyda «Qoqyspen kúresý» marafonynyń jańa maýsymy ashyldy. «Alataý etegi - qala turǵyndary úshin qashanda turaqty demalys orny. Alaıda tabıǵatty lastaý, qoqys tastaýǵa kelgende kemshin tustarymyz az emes. Úlken deńgeıdegi eko-shara qalanyń 1000 jyldyq mereıtoıyna oraı sondaı-aq «1000 ıgi is» aktsııasy aıasynda uıymdastyryldy. Oǵan «Baýyrjan» qaıyrymdylyq qory, Almaty qalasynyń ákimdigi jáne «Tele2 Qazaqstan» kompanııasy «Qoqyspen kúresý» ekologııalyq aktsııasy qoldaý kórsetti. Aktsııanyń basty maqsaty - almatylyqtardy tabıǵı oryndarda tazalyqqa shaqyrý jáne turǵyndarǵa ekologııalyq mádenıetti dáripteý» dep jazady basylym. Nebary eki saǵat ishinde marafonshylar Almaty taýlarynan 1478 keli qoqys jınap úlgerip, ony tıisti jerge ótkizdi. Eń nátıjeli marafonshy, Almaty qalasynyń turǵyny, 53 nómirli Arhat Úkibaev 56,5 keli qoqys jınap, jeńimpaz atandy. Ol Býrabaı demalys ornyna eki adamǵa joldama utyp alǵan. Bul týraly tolyǵyryq «Aıqyn» gazetindegi «1478 keli qoqys jınady» degen materıaldan oqı alasyzdar.
***
«Ekspress-K» basylymy dene túrshiger málimet jarııalap otyr. Qazaqstan boıynsha eki myńnan asa jasóspirim áleýmettik jelilerdegi sýıtsıdqa ıtermeleıtin toptarǵa tirkelgen eken. «Májilis depýtattary jarııalaǵan statıstıkaǵa súıensek, eki myńnan asa jasóspirim osyndaı toptarǵa tirkelgen. Sondyqtan, depýtattar balalar men jasóspirimder ınternetke tek ata-ananyń ruqsatymen qosyla alatyndaı usynys jasap otyr. Halyqaralyq uıymdardyń málimetine súıensek, Qazaqstan 10 jyldan beri jasóspirimder arasyndaǵy sýıtsıd boıynsha álemdegi alǵashqy úsh eldiń ishinde», dep jazady basylym. Bul týraly tolyǵyraq «Ekspress K» gazetindegi «Klıkı smertı» degen maqaladan oqı alasyzdar.