Alty jasar Altaır norveg balalaryn Qazaqstan elshiligine ertip keldi

OSLO. QazAqparat - Norvegııa astanasy Osloda turatyn alty jasar qazaqstandyq qurby-qurdastaryna Qazaqstan týraly aıtyp berdi, dep habarlaıdy QazAqparattyń menshikti tilshisi.

Oslodaǵy «Akerbrygge Barnehage» atty mektepke deıingi bilim berý mekemesiniń tárbıelenýshileri Qazaqstan Elshiligine qydyryp bardy. Olardy saıahatqa shaqyrǵan - alty jasar otandasymyz Altaır Omarov. Onyń ata-anasy qazirgi ýaqytta elshilikte jumys isteıdi.

Altaırdiń aıtýynsha, ol oqıtyn top Norvegııa astanasynyń kórikti oryndaryna úzbeı ekskýrsııa uıymdastyryp otyrady.

«Men jańa dostaryma únemi Qazaqstan týraly, Astanadaǵy záýlim úıler týraly aıtamyn. Sabaqta barys pen qyrannyń sýretin salamyn», - deıdi Altaır.

«Bir kúni ákemnen «dostarymmen birge elshilikke barsam bola ma?» dep suradym. Onyń ústine qazir bizde meıram, Jańa jyldyń qarsańy», - deıdi bala.

Ekskýrsııa kezinde dıplomattar oıyn arqyly balalarǵa Qazaqstan tarıhy týraly aıtyp, qazaqtyń ulttyq salt-dástúrlerimen tanystyrdy, ulttyq kıimderdi kórsetip, elimiz aýmaǵyn mekendeıtin janýarlar týraly áńgimeledi.

Balalar qazaqtyń ulttyq taǵamdarynan dám tatyp, ulttyq oıyndarymyzdy oınady. Dıplomattar balalarǵa otandyq mýltıplıkatorlardyń týyndylaryn da kórsetti.

«Akerbrygge Barnehage» tobynyń aǵa jetekshisi Izabella de Bernardo osyndaı ekskýrsııalardyń balalardyń dúnıetanymyn keńeıtýge yqpal etip, geografııa, tarıh jaıyndaǵy bilimderin molaıtatynyn tilge tıek etti. «Qazaqstan Elshiligine sheksiz alǵys bildiremin. Shynymdy aıtsam, ózim de birshama paıdaly dúnıelerdi bilip aldym», - deıdi ol.

Óz kezeginde dıplomattar mundaı kezdesýlerdi ótkizýdi ıgi dástúrge aınaldyrýdy josparlaıtynyn jetkizdi.

Avtor: Týr Batyrov