Alty oblystyń jastary 1 mln teńgeden jeńip alyp, ıdeıalaryn iske asyrady

NUR-SULTAN. QazAqparat - «Zhas Project» jobasy aıasyndaǵy shaǵyn grant konkýrsyna ótinim qabyldaý bastaldy, dep habarlaıdy QazAqparat.

Bıyl joba Almaty, Jetisý, Qaraǵandy, Ulytaý, Mańǵystaý jáne Túrkistan oblystarynda júzege asyrylyp jatyr. Bul jaıynda Azamattyq bastamalardy qoldaý ortalyǵynyń baspasóz qyzmeti málim etti.

«Zhas Project» jobasy aıasynda Almaty, Jetisý, Qaraǵandy, Ulytaý, Mańǵystaý jáne Túrkistan oblystary jastarynyń bastamalaryn qoldaýǵa Aqparat jáne qoǵamdyq damý mınıstrligi 250 shaǵyn grant bóldi.

Ár grant - 1 mln teńge. Jobanyń operatory - Azamattyq bastamalardy qoldaý ortalyǵy.

«Zhas Project» jas qazaqstandyqtardyń múmkindikterin keńeıtýge baǵyttalǵan. Jobaǵa qatysýshylar óz óńirlerinde úzdik áleýmettik ıdeıalardy júzege asyra alady. Osyndaı qoldaýdyń arqasynda biz jastardyń kóshbasshylyq qasıetterin damyta alamyz, olarǵa áleýmettik jáne kásibı bilimin arttyrýǵa, óz daǵdylaryn jetildirýge kómektesip, mentorlyq qoldaý kórsete alamyz», - dedi Azamattyq bastamalardy qoldaý ortalyǵy basqarma tóraǵasynyń mindetin atqarýshy Ǵalym Qurman.

Shaǵyn granttar konkýrsyna áleýmettik jobalardy usynatyn NEET sanatyndaǵy 18-29 jas aralyǵyndaǵy jas qazaqstandyqtar nemese jobalary jastardyń osal toptaryn qoldaýǵa, jergilikti qoǵamdastyqtardyń áleýmettik problemalaryn sheshýge nıetti jastar qatysa alady.

Jobada jumyssyz degen resmı mártebesi bar, az qamtylǵan otbasynda turatyn jastarǵa, jetim jáne múgedektigi bar jas azamattarǵa; múgedektigi bar balany tárbıelep jatqan ata-analarǵa, kópbalaly otbasylarǵa, sondaı-aq «Altyn alqa» jáne «Kúmis alqa» alqalarymen nagradtalǵan kópbalaly analarǵa erekshe basymdyq beriledi.

Ótinim myna saıttarda qabyldanady: zhasproject-almobl.kz, zhasproject-karaganda.kz, zhasproject-mangystau.kz, zhasproject-turkestan.kz,

Jastar ótinimin 10 tamyzǵa deıin jibere alady.