«Altyn izdegen»: Jetisý oblysynda bireýler jerdi oıdym-oıdym qazyp ketken

<p>ASTANA. KAZINFORM — Jetisý oblysy Aqsý aýdany Sýyqsaı aýylynan 25 shaqyrym jerde tereńdigi 2 metrden asatyn shuńqyrlar paıda bolǵan. </p>

Turǵyndardyń aıtýynsha, 2-3 jyldan beri qazba baılyq izdegender oıdy da, qyrdy da qoparyp tastaǵan. Jurt jaılaýǵa shyǵatyn saıdy qazyp, tas alatyn zańsyz kásipkerlerdiń jumysyna qarsy. Sonyń kesirinen mal jaıatyn jer oıdym-oıdym bolyp qalǵan. 

Foto: Mıras Anıtov

«Myna jerde el mal sharýashylyǵymen, eginshilikpen aınalysady. Keleshek balalarymyzǵa qalatyn jer ǵoı. Eshkimnen ruqsat suramaǵan. Oıyna kelgenderin istep jatyr. Bizdiń tabıǵatymyzdy búldirip, jerimizdi qazyp ketkenderi durys emes», — dedi Sýyqsaı aýylynyń turǵyny Ǵalymjan Merekenov.

Halyq tıisti mekemelerdiń osy máselege qatysy bar ma dep kúdiktenedi. Óıtkeni taý-tasty qoparyp, qazba izdegenderge birneshe jyldan beri tosqaýyl bolmaǵan kórinedi.

Foto: Mıras Anıtov

«Myna áńgime uzaryp bara jatyr, toqtatý kerek. Birinshi jyl emes, bári bilip otyr. Qazirgi ákimniń aldyndaǵy basshy kezinde bastalǵan. Toqtatý kerek, baqylaý jasaıtyn etetin organ bar ma ózi?!» — dedi aýyl turǵyny Saılaý Seksenbaev.

Jınalǵan jurttyń aldyna aýdan ákiminiń orynbasary da keldi.

«Endi quqyq qorǵaý organdaryna tapsyramyz, turǵyndar tilegi eskeriledi. Bul jerdegi jumys istep jatqandardyń bári zańsyz. Bizden de, basqa organdardan da ruqsat alynbaǵan. Biz habardar bolǵanymyzǵa, mine, 2-3 kún ǵana boldy. Eshkim aıtqan joq», — deıdi Aqsý aýdany ákiminiń orynbasary Amandos Sabyrbaev.

3 jyldan beri aýyl mańyn qoparyp, qazyp, altyn taýyp júrgenderdiń barlyǵyn jergilikti ákimdik bilmese de, sýyqsaılyqtar jaqsy biledi. Eger munymen zańsyz is bitpese, turǵyndar joǵary ınstantsııalarǵa shaǵymdanamyz dep otyr.