«Altyn Orda» bazarynyń burynǵy basshysy 4 jylǵa sottaldy

<p>QONAEV. KAZINFORM &ndash; Almaty oblysynda &laquo;Altyn Orda&raquo; bazarynyń burynǵy atqarýshy dırektory Ermek Marqabaevqa qatysty sot úkimi shyqty. Oǵan asa iri mólsherde esirtki, psıhotroptyq zattardy, sol tektesterdi ótkizý maqsatynsyz zańsyz saqtap, tasymaldady degen aıyp taǵyldy.</p>

Almaty oblysy Qarasaı aýdandyq sotynyń baspasóz qyzmeti ótken jyldyń jazynda «Almaty-Bishkek» avtojoly boıynda polıtsııa qyzmetkerleri avtokólikti toqtatqan kezde kóliktiń artqy oryndyǵynda sottalýshy M. bolǵanyn habarlady. Jeke tintý kezinde odan ishinde untaqty zat salynǵan túıinshek tabylyp, tárkilengen bolatyn.

«Sot-hımııalyq saraptamanyń qorytyndysyna sáıkes, bul salmaǵy 1,796 gramm bolatyn (asa iri kólemde) psıhotroptyq zat - mefedron bolyp shyqty», - delinedi sottyń habarlamasynda.

Prokýror sottalýshyny Qylmystyq kodekstiń 296-baby 4-bóligimen kináli dep tanyp, ony 5 jylǵa bas bostandyǵynan aıyrýdy surady. Sottalýshy M. kinásin moıyndamaı, aıǵaq berýden bas tartty.

«Sottalýshy M.-nyń kinási qylmystyq is materıaldarymen, onyń ishinde qamaýǵa alý jáne sotta qaralǵan jeke tintý beınejazbalary, psıhotroptyq zattyń ózine jasalǵan qol alaqandarynyń jaǵyndylaryn, tyrnaq bólikterin jáne shalbar qaltasynyń bóligin sot-hımııalyq zertteý nátıjesi boıynsha dáleldendi jáne rastaldy. Onda psıhotroptyq zat – mefedron bar qabattar, sondaı-aq is boıynsha jınalǵan basqa da dáleldemeler anyqtaldy», - dep habarlady aýdandyq sottyń baspasóz qyzmeti.

Sot jaza taǵaıyndaý kezinde sottalýshynyń jas balasy bolýyn qylmystyq jaýapkershilik pen jazany jeńildetetin mán-jaı dep tanydy. Qylmystyq jaýapkershilikti nemese jazany aýyrlatatyn mán-jaılar anyqtalǵan joq.

«Sot úkimimen M. QK-niń 296-babynyń 4-bóliginde kózdelgen qylmystyq quqyq buzýshylyqty jasaǵany úshin kináli dep tanylyp, 4 jyl merzimge bas bostandyǵynan aıyrý jazasy taǵaıyndaldy. Úkim zańdy kúshine engen joq», - dep habarlady Qarasaı aýdandyq sotynyń baspasóz qyzmeti.

Eske salsaq, ótken jyly maýsym aıynda «Altyn Orda» bazary dırektory orynbasarynyń ustalǵany týraly beınerolıkter áleýmettik jelide taraǵan edi.