«Altyn Orda» bazarynda áli de zańsyz aqsha jınaıtyndar bar ekeni ras pa – komıtet ókiliniń jaýaby

<p>ASTANA. KAZINFORM &ndash; Saýda jáne ıntegratsııa mınıstrligi Saýda komıtetiniń tóraǵasy Aıdar Ábildabekov áleýmettik jelidegi &laquo;Altyn Orda&raquo; bazary týraly shaǵymdarǵa pikir bildirdi.</p>

«2022 jyly Bas prokýratýranyń bastaýymen qazir kóp aıtylyp, kóp jazylyp júrgen «Altyn Orda» bazarynda úlken tekserý boldy. Byltyr ózim sol bazarda birneshe apta bolǵan shyǵarmyn. Óıtkeni bazardy tártipke keltirý týraly qaıta tapsyrma túsken bolatyn», - dedi Aıdar Ábildabekov vedomstvo janyndaǵy qoǵamdyq keńes májilisinde.

Sondaı-aq, komıtet tóraǵasy áleýmettik jelide bazar týraly taraǵan málimetterdi teriske shyǵardy.

«Ol bazarda bir taýardy ondaǵan adamnyń bir-birinen alyp, qaıta satyp júrgeni týraly beınerolıkter taraǵanyn aıtyp otyrsyz. Ondaı jaǵdaı joq. Bazarǵa kirgen júk kólikterinen, kóterme saýdagerlerden birneshe qaıtalap aqsha alatyny, baǵanyń sol úshin kóterilip jatqany da, ondaı joq. Bir ret kiredi, bir ret qana tóleıdi. Onyń quny ornalasqan qataryna baılanysty – bir jerde 18 myń teńge, bir jerde 15 myń teńge. Bir kirgen kólik 5 táýlik tura alady», - dedi ol.