Altyn-Emeldegi qaraquıryq, qulan men arqar sany kóbeıdi

<p>ASTANA. KAZINFORM &ndash; &laquo;Altyn-Emel&raquo; memlekettik ulttyq tabıǵı parkinde Qyzyl kitapqa engen arqar, qulan jáne qaraquıryqtyń sany anyqtaldy.</p>

Sanaq jumystaryna Bilim jáne ǵylym mınıstirligi Ulttyq ǵylym akademııasynyń zoologııa ınstıtýty, «Ohotzooprom» ÓB» RMQK-i, Qazaqstan bıoalýantúrlilikti saqtaý qaýymdastyǵy, Jetisý oblystyq orman sharýashylyǵy jáne janýarlar dúnıesi aýmaqtyq ınspektsııasy, «Jońǵar-Alataýy» MUTP-i qyzmetkerleri jumyldyrylǵan.

«Altyn-Emel» memlekettik ulttyq tabıǵı parkiniń bas ań tanýshy mamany Muhıt Muqataıulynyń agenttik tilshisine bergen málimetinshe, park aýmaǵynda shamamen 6 myńǵa jýyq qaraquıryq, 4 myńǵa jýyq qulan jáne 200-ge jýyq arqar tirkelgen. Ótken jyldarmen salystyrǵanda úsh janýardyń da ósimi baıqalady.

– Jabaıy janýarlardyń sanaǵy ár jyl saıyn tek aqpan aıynda júrgiziledi. Kóktemde janýarlar tóldeıdi. Sáıkesinshe, qalǵan ýaqytta olardy qýalaýǵa bolmaıdy. Sanaq jumystary 307 myń gektar aýmaqty qamtyp, bul iske 46 maman tartyldy. Eki kún boıy kólikke, atqa mingen mamandar jolaı kezdesken janýarlardy tirkep otyrdy, – deıdi M. Muqataıuly.

Onyń aıtýynsha, qulannyń sany artqan saıyn elimizdiń ózge óńirlerindegi qoryqtarǵa jóneltiledi.

– Byltyr «Іle-Balqash» qoryǵyna 60 bas qulan jiberildi. Janýar kez kelgen aımaqqa jersine beredi. Aldaǵy ýaqytta «Altyn-Emel» memlekettik ulttyq tabıǵı parki aýmaǵynda taýteke, qar barysynyń sanaǵy júrgiziletin bolady, – deıdi ań tanýshy.

Aıta keteıik, Jetisý oblysynda ornalasqan «Altyn-Emel» memlekettik ulttyq tabıǵı parki aýmaǵynda sútqorektilerdiń 79 túri meken etedi. Onyń 11-i Qyzyl kitapqa engen. Sondaı-aq qustardyń 260 túri bar (Qyzyl kitapqa engeni – 29). Budan bólek 4 qosmekendi (ekeýi Qyzyl kitapqa engen), 25 baýyrymen jorǵalaýshylar (bireýi Qyzyl kitap tiziminde), balyqtyń 26 jáne býynaıaqtylardyń 6000 túri tirkelgen.