Altaılyqtar baspanasyz qalǵan Rıdder turǵyndaryna 8 mln teńge jınap berdi

ÓSKEMEN. QazAqparat – Shyǵys Qazaqstan oblysy Altaı aýdanynyń halqy alapat órtten baspanasynan aıyrylǵan otbasylarǵa kómek retinde 8 mln teńge jınady, dep habarlaıdy QazAqparat tilshisi.

Birneshe kún ishinde «Nash gorod Zyrıanovsk» jeke qaıyrymdylyq qoryna kásipkerler, ákimdik qyzmetkerleri men aýdan turǵyndary atynan 8 mıllıon teńgeden astam qarajat tústi.

Búkil jınalǵan soma Rıdder qalasynyń «Birlik» qaıyrymdylyq qoryna aýdaryldy.

«Sondaı-aq «Nur Otan» partııasynyń Altaı aýdandyq fılıalynda gýmanıtarlyq kómek aktsııasy jarııalanyp, oǵan jergilikti jurtshylyq, kásipkerler men túrli uıym ókilderi belsendi qatysty. Nátıjesinde 2 tonnadan astam ártúrli tamaq ónimderi, dári-dármek jáne jeke gıgıena zattary jınaldy. Budan bólek, Rıdderge kórpe-jastyqtar, balalarǵa arnalǵan 11 tósek pen qurylys materıaldary da jiberildi», - dep habarlady ShQO Aqparat ortalyǵy.

Esterińizge sala ketsek, 10 mamyrda Shyǵys Qazaqstandaǵy Rıdder orman sharýashylyǵynda alapat órt shyqqan bolatyn.

Órtten 1 adam qaza taýyp, ekeýi jaraqat alǵan.

Memleket basshysy Úkimet pen Shyǵys Qazaqstan oblysynyń ákimdigine tilsiz jaýdan zardap shekken Leshoz kentiniń turǵyndaryna kómek kórsetip, baspanamen qamtamasyz etýdi tapsyrdy.

11 mamyr saǵat 18.20 kezinde órt aýyzdyqtaldy.