Altaılyq sýretshi 99 metrlik «Tórt mezgil jáne júz túıe» atty kartına saldy — sheteldegi qazaq baspasózi
Túrkııa men Qazaqstan qorǵanys salasynda yntymaqtastyq artyp keledi — TRT
Túrkııa men Qazaqstannyń qorǵanys salasyndaǵy yntymaqtastyǵy artyp keledi. Atap aıtqanda, Qazaqstanda Túrik aeroǵarysh ónerkásibi AQ «TUSAŞ»-tyń shyǵarǵan «ANKA» aýyr klasty pılotsyz áýe kólikteriniń áskerı maqsatty tájirıbeleri jalǵasýda.
Bul týraly osy aptada Túrkııa Radıo Televızııa portaly habarlady.
Túrkııalyq BAQ-tyń málimetinshe, OTOKAR kompanııasy jetildirgen «COBRA II» brondy kólikteriniń Qazaqstan Qorǵanys mınıstrliginiń ınventaryna osy jyldyń sońyna deıin enýi kútilýde.
Bul týraly QR Premer-Mınıstrliginiń resmı ınternet paraqshasynda Qorǵanys mınıstrliginiń birinshi jartyjyldyqtaǵy qyzmeti týraly esep te jarııalandy.
«ANKA» pılotsyz áýe kólikterimen birge jyl sońyna deıin Qazaqstan Áýe qorǵanys ınventarynyń zamanaýı áskerı ushaqtarymen, «A400M» áskerı júk ushaqtary jáne joǵary dáldiktegi zymyrandy ushaq qaǵar qurylǵylarymen odan ári nyǵaıtý kózdelýde», — dep jazǵan túrkııalyq BAQ.
Sondaı-aq osy aptada «TRT»-da «Atatúrik týǵan úıge kelýshi kóp» degen taqyryptaǵy aqparat jarııalandy.
Atalǵan BAQ-tyń dereginshe, Túrkııa Respýblıkasyn qurýshy Mustafa Kemal Atatúriktiń Grekııanyń Salonıkı qalasynda dúnıege kelip, 7 jasyna deıin turǵan. Bul úı — qazir murajaı. Sol murajaı-úıge zııarattap kelýshiler sany óte kóp.
1933 jyly satyp alynyp, Mustafa Kemal Atatúrikke syıǵa tartý josparlanǵan úıdiń kilti Túrkııanyń Salonıkıdegi bas konsýldyǵyna 1937 jyly tapsyrylǵan. 1953 jyly kelýshilerge esigin ashqan murajaı-úı 2012 jylǵy aýqymdy restavratsııadan keıin qazirgi kúıine kelgen.
Aıta ketý kerek, qazir osy murajaıǵa Túrkııadan jáne álemniń kóptegen elinen qonaqtar keledi. Ásirese jaz aılarynda Grekııaǵa demalys úshin kelgender mindetten túrde soǵyp ketedi.
Qytaıda saǵatyna 1000 shaqyrym júretin poıyzdyń alǵashqy synaǵy sátti ótti — «Halyq gazeti»
Qytaıdyń Shansı ólkesiniń Datýn qalasyndaǵy ıAngao aýdanynda joǵary jyldamdyqty kólikterdi synaý bazasynan alǵan aqparatyna sáıkes, jaqynda Qytaı ázirlegen ýltra joǵary jyldamdyqty tómen vakýýmdy qubyrda maglev tasymaldaý júıesiniń tolyq ólshemdi synaq jelisi (I Faza) tómen vakýýmdy ortada júıeni biriktirý demonstratsııasyn jáne tekserý synaǵyn sátti aıaqtady.
Bul jaıynda Qytaıdyń «Halyq gazeti» basylymy «Science and Technology Daily» gazetine silteme jasap habarlady.
Atalǵan alǵashqy synaqta kúshti navıgator qoldanylǵan.
«Joǵary jyldamdyqty kólik jobasynyń qurylysy 2022 jyldyń sáýir aıynda Datýn qalasynyń ıAngao aýdanynda resmı túrde bastaldy. Joba aeroǵaryshtyq tehnologııalar men jer ústi temirjol tranzıti tehnologııalaryn biriktiredi. Maqsat — saǵatyna 1000 shaqyrym jyldamdyqpen júre alatyn temirjol poıyzdarynyń ýltra joǵary jyldamdyqtaǵy „jer betinde ushýyna“ qol jetkizý», -dep jazady qytaılyq BAQ.
Sonymen qatar osy aptada «Halyq gazeti» basylymynda «Qytaı — Qazaqstan — Ózbekstan baǵdary boıynsha júkti jedel jetkizý uıymdastyryldy» degen taqyryptaǵy aqparat jaryq kórdi.
Qytaıdyń «Halyq gazeti» basylymynyń «rail-news.kz»-ke silteme jasap habarlaýynsha, konteınerlik poıyz rekordtyq 5 kúnde 4486 shaqyrymdyq joldy júrip ótken.
Atalǵan BAQ-tyń keltirgen deregine súıensek, júk quramy Sıan qalasy portyndaǵy Qazaqstan-Qytaı termınalynan jóneltildi. Konteınerler KTZE Khorgos Gateway Qurǵaq portynda qaıta tıeldi jáne QTJ jelisi boıynsha Saryaǵash shekara mańy stantsııasyna, odan ári sońǵy núkte — Ortalyq Azııanyń iri kólik haby Tashkent stantsııasyna deıin júrýdi jalǵastyrǵan.
Astanada «Ózbek kınosynyń kúnderi» ótip jatyr— «ÓzA»
Qazaqstannyń bas qalasy Astana qalasynda «Ózbek kınosynyń kúnderi» ótip jatyr. Onyń aıasynda Kınematografııa agenttiginiń tapsyrysy boıynsha Mýzaffarhan Erkınov túsirgen «Abdýlla Arıpov» kórkem fılminiń kórsetilimi ótti, dep habarlaıdy ózbekstandyq «ÓzA» aqparattyq agenttigi.
Ózbekstanadyq BAQ-tyń dereginshe, sondaı-aq, Ózbekstan Respýblıkasy Mádenıet mınıstrligi Kınematografııa sektoryn úılestirý basqarmasynyń bas mamany Otabek Jýraev, Kınematografııany damytý ortalyǵynyń dırektory Fýrkat Ýsmanov, Kınematografııany damytý jónindegi Ortalyqtyń halyqaralyq baılanystar bóliminiń basshysy Saıera Hýdoıberdıeva, akter jáne rejısser Samıdhan Lýtfýllaev pen QR Ulttyq kınony qoldaý memlekettik ortalyǵynyń basqarma tóraǵasy Jumaǵalı Qurmanbek arasynda yntymaqtastyq kezdesýi ótti.
Kınematografııa agenttiginiń aqparat qyzmetiniń habarlaýynsha, kezdesý barysynda Ózbekstan men Qazaqstan kınogerleriniń birlesip túsirýi josparlanǵan «Ál-Farabı» kórkem fılmi talqylanǵan.
«Sonymen qatar, Ózbekstan delegatsııasy qazaqstandyq kınematografısterdi qyrkúıek aıynda Tashkentte ótetin „Jibek jolynyń jaýhary“ XVI Tashkent halyqaralyq kınofestıvaline shaqyryp, aldaǵy ýaqytta jan-jaqty yntymaqtastyq ornatýǵa ýaǵdalasty», — delingen habarlamada.
Altaılyq sýretshi 99 metrlik «Tórt mezgil jáne júz túıe» atty kartına saldy — «People.cn»
Jaqynda Shyńjańnyń Altaı aımaǵynyń sýretshisi Jao Keı jarty jyl boıy salǵan qytaılyq kartına — «Tórt mezgil jáne júz túıe» dep atalatyn eńbegin jarııalady, dep habarlady Qytaıdyń «Halyq gazeti».
Atalǵan basylymnyń derginshe, «Tórt mezgil júz túıe» sýreti 79 týyndydan turady. Kóktemde, jazda, kúzde jáne qysta dep 4 bólikke bólingen. Sýrettiń ár bóliginiń uzyndyǵy shamamen 20 metr bolady, al jalpy uzyndyǵy 99 metrdi quraǵan.
«Týyndy Altaıdyń tórt mezgilin fon etip, óndiris pen ómirdegi túıelerdiń kórinisin kórsetedi. Myńǵa jýyq túıeniń pishini ártúrli keskindelgen. Bul sýretshiniń jetilgen sheberligin jáne týǵan mekenine degen tereń súıispenshiligin kórsetedi», — dep jazdy qytaılyq BAQ.
Qaǵyr jazyqty ormanǵa aınaldyrǵan búginginiń batyry — Beket Suraǵanuly — «Jańa dáýir»
Osy aptada Baıan-Ólgeıden shyǵatyn «Jańa dáýir» basylymynda «Keń jazyqty ormanǵa aınaldyrǵan búginginiń batyry — Beket Suraǵanuly» degen taqyryptaǵy maqala jaryq kórdi.
Biz osy jolǵy reportajymyzda Baıan-Ólgeı aımaǵyndaǵy Altantsógts sumynynan 16 shaqyrym qashyqtyqta Tsonjıın Hódóó dep atalatyn qaǵyr jerden 10 gektar aýmaqty jasyl jelekti ormanǵa aınaldyrǵan sharýashylyq ıesi Beket Suraǵanuly jáne jubaıy Gúlııa Maqsulqyzynyń eńbegi týraly baıandaımyz, dep jazady «Jańa dáýir».
Atalǵan BAQ-tyń keltirgen málimetine súıensek, 2009 jyly alǵash kompanııa quryp, jazyq dalaǵa júzge jýyq shybyq ákelip egedi. Qolmen ıaǵnı motordyń kómegimen sol taldardy sýaryp, shyrǵanaqtyń tuqymyn otyrǵyzady.
Alǵash osy jumysty qolǵa alǵanda keıbir adamdar kelip, mundaı taqyr jerge egin qaıdan shyqsyn deıdi. Kelesi jylynda egininen oıdaǵydaı ónim alady. Sóıtip jerdiń alystyǵyna, kúnniń ystyǵy men eńbektiń aýyrlyǵyna qaramaı osy jumysqa bel sheshe kirisedi. Jyl saıyn aǵash sanyn qosyp egý, kóktemde jer jyrtý, tuqym sebý, shyrǵanaqtyń eń tańdaýly sortyn ákelip otyrǵyzý, biletin mamandardan tájirıbe jınaý, aqyl-keńester alý taǵy basqadaı kóptegen izdenisterdiń nátıjesinde búgingi tańda jaıqalǵan ný, ıt tumsyǵy ótpesteı tutasqan orman bolǵan.
10 gektar jerde qaıyń tal terek qatarly aǵashtar ósýmen birge, shyrǵanaq, qaraqat, sarymsaq, qyzylsha, kartop taǵy basqadaı ártúrli kókenister egilip otyr.
«Bekjanaı» dep atalatyn kompanııanyń dırektory Beket Suraǵanuly berik ustanymnyń arqasynda el kútpegen nátıjelerge qol jetkizgen. Ekiniń biriniń qolynan kelmeıtin aýqymdy sharýany bastaǵan ol Hovd ózeniniń arnasyn buryp, bógeý sap, 6 shaqyrym jerge astyna tas tósep, tsementtep aryq qazyp, eginine sý ákelgen.
Negizinde Beket Suraǵanulynyń mamandyǵy — sport muǵalimi eken. Aımaqqa aty shyqqan tuńǵysh halyqaralyq bylǵary qolǵap sheberi bolǵan. Bul kásipke kirisýde mamandardyń aqyl-keńesine, tájirıbesine súıengen.
Irandyq derekti fılm halyqaralyq kınofestıvalde altynshy ret úzdikter qatarynda — Parstoday
Irannyń «Dem» atty derekti fılmi Italııa kınofestıvaliniń (Nebrodi Cinema DOC international Festival) fınalyna shyqty.
Bul kınofestıval áleýmettik jáne ekologııalyq máseleler boıynsha táýelsiz rejısserlerdi qoldaý maqsatynda 7-13 qazan aralyǵynda ótedi, dep habarlady Irannyń «Parstoday» aqparat agenttigi.
Atalǵan agenttiktiń málimetinshe, Behzad Rezaıdiń rejısserligimen túsirilgen «Dem» ırandyq derekti fılmi altynshy ret halyqaralyq festıvalde kórsetilip jatyr.
Atap aıtqanda, buǵan deıin atalmysh derekti fılm 43-shi Paladino d’Oro Sport Film Festival kınofestıvaliniń «Ózge kıno» bóliminde úzdik fılm syılyǵyn alǵan. 11-shi Túrik Jibek joly festıvaliniń fınalısti boldy, Italııanyń nostalgııasy jáne AQSh-tyń Dúnıejúzilik mýzyka jáne táýelsiz kıno festıvali (World Music & Independent Film Festival) men Úndistannyń Djaıpýr kınofestıvaliniń eń úzdik derekti fılm nomınatsııasyna ıe bolǵan.
Aıta keteıik, Irannyń «Dem» atty derekti fılmi koronavırýs indeti kezinde adamdardyń jalǵyzdyǵy jáne ózara baılanysynyń joqtyǵyn, onyń álemniń ártúrli elderindegi sýretshilerdiń jeke ómirine, jalǵyzdyǵyna jáne shyǵarmashylyǵyna áserin beıneleıdi.