Altaıdaǵy qazaqtarmen kezdesý: qaımaǵy buzylmaǵan Qosaǵashym
Orys, altaı, qazaq halyqtarynyń tatýlyqty tý etken mekeninde quramynda Otandastar qorynyń prezıdenti Abzal Saparbekuly jáne Parlament depýtattary Ǵalıasqar Sarybaev, Bolat Kerimbek pen bir top zııaly qaýym ókilderi bar resmı delegatsııany Qosaǵash aýdanynyń ákimi Serikjan Murathanuly men aýdan máslıhaty tóraǵasy Sanash Dıdýnov shekara shebinen qarsy alyp, Altaı qazaqtarynyń murasy saqtalǵan Jańa aýyl eldimekenine alyp bardy. Delegatsııa músheleri óńirdiń turmys-tirshiligimen tanysyp, osyndaǵy ulttyq qundylyqtar dáriptelgen murajaıdy aralady.
Altaı Respýblıkasynda aýmaǵy jaǵynan eń úlken jáne úsh birdeı elmen shekaralas jatqan (Mońǵolııa, Qazaqstan, Qytaı) Qosaǵash aýdanynyń halqy qazaqy dástúri men saltyn jaqsy saqtaǵan. Atap óterligi, Reseıdegi qazaq tilinde 1-5 synyptarǵa arnalǵan oqýlyq ótken jyly osy jerde ustazdardyń uzaq jylǵy eńbegimen ótken qoldanysqa endi.
Halyqpen kezdesý aýdan ortalyǵynda ornalasqan saıabaqta resmı delegatsııamen qatar júrgen qaraǵandylyq «Táttimbet» atyndaǵy akademııalyq ulttyq aspaptar orkestrdiń saltanatty kontsertimen jalǵasty. Bul sharalar Reseı halqynyń Otbasy kúnimen oraılas keldi.
Qazaqstan táýelsizdik alǵannan beri alǵash ret osy deńgeıde qazaqsha kontsert tyńdaǵan qosaǵashtyqtar erekshe qýanyshqa bólenip, kózderine jas aldy. Atamekennen alysta jatqan Altaı qazaqtarynyń kóńili marqaıyp, rýhy asqaqtap, Qazaqstanǵa duǵaı sálemderin jetkizdi.
Shara sońynda aımaq halqynyń birligi, qazaq tilin saqtaý jolynda aıanbaı eńbek etip júrgen Qosaǵashtaǵy qazaq mádenı ortalyǵynyń basshysy Arqalyq Sultanov QR Prezıdenti Qasym-Jomart Toqaevtyń Alǵys hatymen marapattaldy. Sonymen qatar aýdan ákimi Serikjan Murathanuly men aýdandyq májilis tóraǵasy Sanash Dıdýnovqa «Otandastar qory» alǵys haty jáne «Alǵys» estelik medali tabys etildi.