Altaı Kólginov jylytý maýsymyna daıyndyq boıynsha birqatar tapsyrma berdi
«Jylytý maýsymyna jylýmen qamtý júıelerin daıyndaýdy jazda bastaımyz. Elordada jylytý maýsymy shamamen 7 aıǵa sozylatynyn eskerer bolsaq, qysqa aldyn ala daıyndalý qajet. JEO, Astana-Teplotranzıt, Astana-AEK ókilderimen jáne basqa da jaýapty tulǵalarmen osy másele talqylandy. Jylytý maýsymynda qalany jylýmen qamtamasyz etý boıynsha birqatar tapsyrma berdim.
Birinshi. Áleýmettik nysandar men turǵyn úılerdi ýaqytyly jylytý júıesine qosý qajet. Búgingi tańda bilim berý nysandarynyń daıyndyǵy – 99%, densaýlyq saqtaý nysandarynyń daıyndyǵy – 95%, turǵyn úı qorynyń daıyndyǵy – 81%-dan joǵary jáne t.b.
Barlyq kórsetkishti 100%-ǵa jetkizý qajet. Jańa nysandardy jylytý júıesine qosylý kózderin anyqtap, qýatyn tekserý mańyzdy.
Ekinshi. Eldi meken turǵyndaryna gazǵa qosylý úshin tehnıkalyq sharttar berýdi jalǵastyrý qajet.
Bıylǵy jylytý maýsymynda gazǵa qosylý múmkindigi taǵy 7 eldi meken turǵyndaryna beriledi. Olardyń qatarynda Ońtústik-Shyǵys, Promyshlennyı, Kóktal-1, Agroqalashyq (2020 jyly qosylmaǵan bólik) bar. Sondaı-aq, «QazTransGaz Aımaq» AQ Kúıgenjar, Mıchýrıno, Internatsıonalnyı eldi mekenderinde gazben jabdyqtaý jelileriniń qurylysyn júrgizýde. «Qazaqaýyl» (Qaraótkel) shaǵyn aýdany boıynsha jobalaý-smetalyq qujattama daıyndalyp jatyr.
Ótken jylytý maýsymynda Temirjolshylar, Kóktal-2, Agroqalashyqtyń bir bóliginiń turǵyndary gazǵa qosyldy. 345 km kvartalishilik gazben jabdyqtaý jelilerin saldyq.
Úshinshi. Elordany gazdandyrý úsh kezeńde júrgiziletinin, onyń sońǵy kezeńi 2023 jylǵa josparlanǵanyn eskere otyryp, qalada kómir satýdyń 10 núktesi belgilendi. Jetkizýdi esepke almaǵanda, ortasha quny – 13 myń teńge (kómir sortyna baılanysty).
2019 jáne 2020 jyly kómirdi satý núktelerinde eshqandaı qıyndyq bolǵan joq, sondyqtan bıylǵy jylytý maýsymynda da jasandy tapshylyqqa jol berýge bolmaıdy, óıtkeni qoımalardaǵy otyn kólemi jetkilikti.
Tórtinshi. Jylý elektr ortalyqtary qalany jylýmen úzdiksiz qamtamasyz etýge múmkindik beretin strategııalyq nysandar bolyp sanalady. Jyl sońyna deıin JEO-1 jáne JEO-2-de sý jylytý qazandyqtaryn tolyqtaı gazǵa aýystyramyz.
JEO-3 boıynsha jobaǵa túzetý júrgizildi, qurylys-montajdaý jumystary, onyń ishinde sý jylytý qazandyǵynda da qaıta jandandy. Nysandy iske qosý 2022-2023 jylǵy jylý berý maýsymyna josparlanǵan, JEO-3 6,5 mln sharshy metr turǵyn úıdi, onyń ishinde áleýmettik nysandardy, ákimshilik ǵımarattardy jáne t.b. jylýmen qamtýǵa múmkindik beredi.
Sonymen qatar, osy jyly eki gaz qazandyǵynyń qurylysyna kirisemiz. Olardyń qýattylyǵy JEO-3 qýatynan 2 ese artyq. Qazandyqtar birinshi kezekte tapshylyq boljanatyn ýchaskelerdi jylýmen qamtamasyz etetin bolady», – dep jazdy elorda ákimi.