Altaı Kólginov jumys berýshiniń eńbek qaýipsizdigi boıynsha jaýapkershiligin kúsheıtýdi tapsyrdy

ASTANA. QazAqparat – Jumys berýshiniń eńbek qaýipsizdigi boıynsha jaýapkershiligin kúsheıtý kerek. Elordada ótip jatqan «KIOSH-2023» Halyqaralyq konferentsııasyna baıandama jasaǵan Premer-Mınıstrdiń orynbasary Altaı Kólginov osylaı málim etti, dep habarlaıdy QazAqparat tilshisi.

«Jumys berýshiniń eńbek qaýipsizdigi boıynsha jaýapkershiligin kúsheıtý kerek. Sonymen birge eńbek salasyna memlekettik jáne qoǵamdyq baqylaýdy qatańdatý mańyzdy. Bul rette qoǵamdyq qadaǵalýǵa kóp kóńil bólinýi tıis. Bul jumys berýshi men qyzmetker arasyndaǵy dıalogty damyta túsedi. Sondyqtan bizge búginde 245 kásiporynda qoldanylatyn «Halyq baqylaýy» baǵdarlamasyn keńeıtý qajet. Buǵan qosa, 420 kásiporynǵa engizilgen «nóldik jaraqattaný» tujyrymdamasyn odan ári jetildirý oryndy bolmaq», - dep Eńbek jáne halyqty áleýmettik qorǵaý mınıstrliginiń ókilderine tapsyrma júktedi Altaı Kólginov.

Ol óńirlerdegi jazataıym oqıǵalardy tergeýmen aınalysatyn komıssııanyń jumys formatyn ózgertýdi usyndy. Vıtse-Premerdiń sózinshe, olar máseleniń saldarymen emes, sebebimen kúresip, qyzmet baǵytyn aldyn alý sharalaryna baǵyttaýy tıis.

Altaı Kólginovtiń málimdeýinshe, jyl saıyn elimizdegi kásiporyndarda 2 myń adam ónerkásiptik jaraqat alyp, saldarynan shamamen 200 jumysker kóz jumady.