Altaı Kólginov tozyǵy jetip eskirgen úılerdiń turǵyndarymen kezdesti

NUR-SULTAN. QazAqparat - Nur-Sultan qalasynyń ákimi Altaı Kólginov Instagram paraqshasynda tozyǵy jetken eski úılerdiń turǵyndarymen kezdeskenin málim etti, dep habarlaıdy elorda ákimdiginiń resmı saıty.

«Qala turǵyndarynyń baspana jaǵdaıyn jaqsartý úshin áleýmettik páterler salý, qoljetimdi jeńildikpen beriletin turǵyn úı baǵdarlamalaryn júzege asyrý, turǵyn úı keshenderin jóndeý, qurylysy uzaqqa sozylǵan nysandardy aıaqtaý boıynsha aýqymdy jumys atqarylyp jatyr.

Tozyǵy jetken apatty úılerdi súrý boıynsha da jumys júrgizilýde. Úıler eskirip, tozyǵy jetkendikten shatyrynan sý ketip, irgetasy qulaǵaly turady. Sol sebepti elektr, káriz júıelerinde únemi problemalar týyndap turady. Qurylys jylyn eskerer bolsaq, ishinde peshi, al dárethanasy syrtynda ornalasqan kóppáterli úıler de bar.

Bıyl apatty jaǵdaıdaǵy úılerden 300-den astam otbasyn kóshirýdi josparlap otyrmyz. Búgin tozyǵy jetip eskirgen eki úıdiń turǵyndarymen kezdestim. Alǵashqysy – Dúkenuly, 21 (Saryarqa aýdany) mekenjaıynda ornalasqan bes qabatty jataqhana turǵyndary. Osydan bir jyl buryn osy úıdiń turǵyndarymen kezdesip, problemalardyń bárin birlesip talqyladyq. Úı tolyǵymen súriletin boldy. Bul másele máslıhatta qoldaý taýyp, osy jylǵa arnalǵan súrý josparyna engizildi.

Sondaı-aq Ýgolnaıa kóshesi, 12a (qazirgi Ál Farabı dańǵyly, 27, Baıqońyr aýdany) mekenjaıynda ornalasqan apatty úıdiń turǵyndarymen kezdestim. Bul úıdiń 75%-y tozǵan. Úı apatty dep tanyldy, ol da tizimge engizilgen. Turǵyndar qujattardyń bárin retke keltirýi qajet. Ár páter boıynsha suraqtar qaralady.

Sońǵy 3 jylda apatty úılerden 700-ge jýyq otbasy kóshirildi. Sondaı-aq, turǵyn úı keshenin jóndeý, lıftilerdi aýystyrý, qurylysy uzaqqa sozylǵan úılerdi aıaqtaý boıynsha jumystar júrgizemiz.

Memleket basshysynyń tapsyrmasy boıynsha jeńildikpen beriletin qoljetimdi turǵyn úı qurylysynyń kólemi aıtarlyqtaı ulǵaıdy», – dep jazdy elorda ákimi.