Altaı Kólginov: Meniń úıimde sý aǵyp tur, biraq Astananyń keı aýdandarynda sý máselesi bar

ASTANA. QazAqparat – Premer-Mınıstrdiń orynbasary Altaı Kólginov Astana ákimi bolyp turǵanda qalanyń sý máselesin sheshý úshin qandaı jumys tyndyrǵanyn aıtty, dep habarlaıdy QazAqparat tilshisi.

«Ákim kezimde jasalǵan jumystardy aıtyp bereıin. Alpysynshy jyldardyń sońynda birinshi stansa iske qosylǵan. Ekinshisi 2011 jyly jumys isteı bastady. Biraq Astananyń ósýine, turǵyndardyń kóbeıýine baılanysty 2020 jyly jobalaý jumystaryn bastap, 2021 jyly jańa stansa qurylysyn bastadyq. Ol jumys qazir aıaqtaldy. Demek jańa stansada qazir qural-jabdyqtardy iske qosý jumysy júrip jatyr. Ákimdiktiń málimeti boıynsha, osy maýsym aıynda sý berilýi kerek. Sony biz jasadyq», - dedi Altaı Kólginov Úkimet otyrysynan keıin kýlýarda.

Jýrnalıster spıkerden óz úıinde sý qanshalyqty irkilissiz berilip turǵanyn surady.

«Meniń úıimde sý bar. Biraq Astananyń keıbir aýdandarynda sý máselesi bar. Ony biz bilemiz», - dedi vıtse-premer.