Altaı Kólginov LRT jobasyn aıaqtaý basty másele ekenin aıtty

NUR-SULTAN. QazAqparat – Elorda ákimi Altaı Kólginov LRT jobasynyń aldaǵy jumystaryna qatysty pikirin bildirdi, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhaty barysynda BAQ ókilderi qala ákimine: «LRT jobasy sońyna deıin salynatyndyǵyn aıttyńyz. Qatty aıazǵa relster men vagondar shydaı ma? Beton baǵandar LRT salmaǵy men jyldamdyǵyna tóze me?», - dep suraǵan edi.

Saýalǵa jaýap bergen qala basshysy jobanyń barlyq tıisti saraptamadan ótkenin basa aıtty.

«Iá, qoǵamnyń alańdaýshylyq tanytyp jatqanyn bilemiz. Bul drys ta. Ol - saraptamadan ótken ınjenerlik qurylym. Joba sarapshylary, qurylysshylar, ınjenerlerimen birlese ázirlenip, bári eskerilgen. Baǵandardyń júktemesi, aýa raıy, bári qaperge alynǵan. Kanadanyń aýa raıy dál bizdegideı. Ol jaqta da LRT bar jáne mamandarymyz baryp kórdi. Bul suraqty kelisimshartqa qol qoıǵan konsortsıýmǵa, seriktesterge de qoıdyq», - dedi ákim.

Onyń atap ótýinshe, beton baǵandar óte sapaly quıylǵan.

«Árqaısysy shamamen 200-220 tonnany quraıdy, olar armatýralanǵan, temir-betondy. Beton markasy óte sapaly. Sapasyn mamandar tekseredi. Tehıkalyq, avtorlyq qadaǵalaý bar. Ol jerde birneshe baqylaý júredi. Eń bastysy – bul jobany aıaqtaý», - dedi Altaı Kólginov.