Altaı Kólginov LRT qurylysy týraly: Jeltoqsanda 30 mlrd teńge bólinedi

ASTANA. QazAqparat – Astana qalasynyń ákimi Altaı Kólginov QR Prezıdentin ulyqtaý rásiminen keıin LRT qurylysy týraly pikir bildirdi, dep habarlaıdy QazAqparat tilshisi.

«LRT týraly aıtsaq, jumys bastalyp ketti. Birinshi transhtyń aqshasy bólindi. Qazir ınjenerlik qurandy bólshekteri men arqalyqtary ornatylyp jatqanyn kórip júrsizder. Qazir osynyń bári júrip jatyr. Bizdiń mindet – LRT qurylysyn aıaqtaý. Kelesi jyldyń boljamy boıynsha astanada 1,5 mln adam turatyn bolady. Bul jyl áli aıaqtalǵan joq. Taǵy 100 myń adam qosylatyn shyǵar. Bas jospar boıynsha 5-6 jyldan keıin astanamyzda 2 mln adam turady degen boljam bar», - dedi ákim QR Prezıdentin ulyqtaý rásiminen keıin BAQ ókilderine bergen suhbatynda.

Sondaı-aq, ol atalǵan qurylysqa áli 580 mln dollar kerek ekenin eske saldy.

«Qytaı konsortsıýmymen Qazaqstan tarapy arasynda mindettemeler men kelisimderge qol qoıylǵan. Endi qurylysty aıaqtaý ǵana qaldy. Taǵy 580 mln dollar kerek. Birinshi transhpen 20 mlrd teńge bólingen. Ekinshi transh aıasynda jeltoqsan aıynda 30 mlrd teńge bólinedi. Kelisim Qytaı konsortsıýmy men Qazaqstan arasynda ǵana jasalǵan. Basqa kelisimder joq. Qazaqstan tarapy tapsyrys berýshi bolyp otyr», - dedi Altaı Kólginov.

Aıta keteıik, búgin Astanadaǵy Táýelsizdik saraıynda Qazaqstan Prezıdentiniń ulyqtaý rásimi ótti.