Altaı Kólginov erekshe kútimdi qajet etetin balalardyń analarymen kezdesti

NUR-SULTAN. QazAqparat – Nur-Sultan qalasynyń ákimi Altaı Kólginov erekshe qajettiligi bar balalardyń kútimimen aınalysyp otyrǵan analarmen kezdesti, dep habarlaıdy QazAqparat.

«Erekshe qajettiligi bar balalardyń kútimimen aınalysyp otyrǵan analarmen kezdestim. Kezdesý barysynda turǵyn úı, medıtsınalyq kómek jáne qosymsha bilim alý, jumysqa ornalasý, balalardy ońaltý úshin jaǵdaı jasaý máseleleri kóterildi. Osy baǵyttar boıynsha júıeli jumys júrgizilip jatyr. Ońaltý ortalyqtarynyń jelisin keńeıtemiz, ıppodrom bazasynda ıppoterapııamen aınalysýǵa arnalǵan jabyq manejdiń qurylysy bastaldy. Sonymen birge jańa turǵyn úı keshenderiniń birinshi qabatynda áleýmettik nysandar ashylady (balalarǵa arnalǵan shaǵyn ortalyqtar, ońaltý ortalyqtary, balabaqshalar). Invataksı sany eki ese artty», - dedi ákim óziniń áleýmettik jelidegi paraqshasynda .

Sondaı-aq ákim analarǵa medıtsınalyq kómek alýǵa, jumysqa ornalasýǵa jáne qosymsha bilim alý baǵyttarynda kómektesetindigin jetkizdi.

«Medıtsınalyq kómek alýǵa, jumysqa ornalasýǵa jáne qosymsha bilim alýǵa kómektesemiz. Kezdesýde aıtylǵan máseleler jumysqa alyndy», - dedi ákim.