Altaı Kólginov elordanyń úzdik qurylysshylaryn marapattady
El astanasynyń irgesin qalap, keregesin keńeıtip kele jatqan qurylysshylar qaýymyn qala ákimi Altaı Kólginov kásibı merekelerimen quttyqtady.
«Qalamyzda qurylysshy mamandarǵa degen suranys jyldan-jylǵa ósip keledi. Qurylystyń qarqyn alýy ekonomıkamyzdyń damýyna óz úlesin qosyp otyr. Nur-Sultan qalasyndaǵy sáýletti qurylystar, ásem ǵımarattar men kópqabatty turǵyn úıler qurylysshylardyń eren eńbeginiń arqasynda boı kóterýde. Qalanyń sánin keltirip, aıshyqty etip turǵan qurylystardyń barlyǵynda qurylysshynyń qoltańbasy bar. Ózimiz turyp jatqan baspanalar, balalarymyz oqıtyn mektepter, aýrýhanalar men basqa da nysandardyń barlyǵy qysy-jazy eńbek etetin qurylysshy eńbeginiń jemisi. Birneshe jyldyń ishinde Esildiń sol jaǵalaýynda ákimshilik, úkimettik jáne iskerlik ortalyqtar paıda bolsa, oń jaǵalaýdaǵy eski úılerdiń ornyna zamanaýı kópqabatty turǵyn úı keshenderi salynyp keledi. 20 jylda qala aýmaǵy 3 esege, turǵyndar sany 4 esege ósip otyr», - dedi ol.
Elorda ákiminiń aıtýynsha, eldegi árbir onynshy qurylysyshy Nur-Sultan qalasynda eńbektenip jatyr.
«Arysta qıraǵan úılerdi qalpyna keltirýge de bizdiń qurylysshylar bilek sybanyp kiristi. Áli de kún, tún demeı eńbek etip jatyr. Sol úshin biz alǵys bilidremiz. Qazir elordada 65 myńnan astam qurylysshy, ıaǵnı Qazaqstandaǵy árbir onynshy qurylysyshy eńbek etýde. Jyl saıyn olar 2 mln sharshy metrden astam baspanany qodanysqa beredi. Byltyr elimiz boıynsha qodanysqa berilgen baspanynyń altydan bir bóligi osy Nur-Sultan qalasynda turǵyndarǵa tabystalǵan. Turǵyn úı qory 5,5 esege, baspanamen qamtý kólemi 2 esege artqanyna qaramastan, áli de qoljetimdi baspana jetkiliksiz bolyp tur. Sondyqtan, Prezıdent Qasym-Jomart Toqaev el úshin qoljetimdi baspana qurylysyn arttyrýdy tapsyrdy. Bul mindetti qurylysshylarmen birge atqaramyz», - dedi Altaı Kólginov.
Óz salasynda úzdik tanylyp, qajyrly eńbek etken ozyq mamandar qala ákiminiń qolynan marapattar aldy. Eńbegi elengen 23 qurylysshynyń tórteýi «Qurmetti qurylysyshy» tósbelgisin taǵynsa, qalǵandary qurmet garmmotalarymen marapattaldy.