Altaı Kólginov elordadaǵy bıznestiń jaǵdaıy týraly aıtty

NUR-SULTAN. QazAqparat – Elordada bıznesti qoldaý qadamdary ońtaıly nátıje berdi. Bul týraly elorda máslıhatynyń kezekten tys sessııasynda qala ákimi Altaı Kólginov aıtty, dep habarlaıdy QazAqparat tilshisi.

«9 aıdyń qorytyndysy boıynsha áleýmettik-ekonomıkalyq kórsetkishter ósimdi kórsetip otyr. Nur-Sultan qalasy iskerlik pen kásipkerligi qalyptasqan, óziniń kirisi jyl saıyn artyp kele jatqan qalaǵa aınaldy. Osy oraıda memlekettik baǵdarlamalardyń oryndalýyna, elordanyń qarqyndy damýyna baılanysty. Salyq tólemderi eselep artty. 2020 jyldyń qorytyndysy boıynsha respýblıkalyq bıýdjetke aýdarylǵan tólem 1,1 trln teńgeden asty. Pandemııa kezinde karantındik shekteýlerge baılanysty tıisti qıyndyqtar boldy. Ásirese, shaǵyn jáne orta bıznes salasynda oryn aldy. Memleket tarapynan bıznesti qoldaý qadamdaryna oraı ońtaıly nátıje boldy», - dedi A. Kólginov.

Onyń aıtýynsha, qurylys ındýstrııasynda, ónerkásipte, áleýmettik sektorda ósim baıqaldy.

«Atap aıtqanda, shaǵyn jáne orta bıznestiń jalpy óńirlik ónim qurylymyndaǵy úlesi qazirgi kezde 56,8 paıyzdy qurap otyr. Bul óte jaqsy kórsetkish jáne osy deńgeıde toqtamaýymyz kerek», - dedi qala ákimi.