Altaı Kólginov elorda turǵyndaryna úndeý jasady
Birqatar óńirde radıkaldy minez tanytyp otyrǵandar tártipsizdik jasaǵanyna toqtalǵan elorda ákimi, olar qalalardyń ınfraqurylymyna, bıznes nysandaryna zalal keltirgenin, turǵyndar ómiri men densaýlyǵyna qaýip tóndirgenin atap ótti.
«Osy kúnderi destrýktıvti kúshterdiń úndeýlerin bizdiń qalada da baıqap otyrmyz. Quqyq qorǵaý organdary barlyq faktilerdiń jolyn kesip jatyr. Polıtsııa departamenti men basqa da kúsh qurylymdar kúsheıtilgen jumys rejımine kóshirildi», - dedi ákim.
Osy oraıda ol elordada tótenshe jaǵdaıdyń kúshinde bolýy kezeńinde 23 saǵat 00 mınýttan 7 saǵat 00 mınýtqa deıin komendanttyq saǵat engizilgenin eske saldy. Tótenshe jaǵdaı rejımi 19 qańtarǵa deıin jalǵasady.
Qalada tártipti ornatý men qaýipsizdikti qamtamasyz etý boıynsha jedel shtab jumys istep tur.
Qala ákimi turǵyndarǵa adamdar kóp jınalatyn jerlerge barmaýǵa, destrýktıvti kúshterdiń úndeýine ermeýge jáne zańsyz jınalystarǵa barmaýǵa shyqyrdy.
Qaýipsizdik maqsatynda mektep oqýshylary úshin kanıkýl 17 qańtarǵa deıin, ýnıversıtet pen kolledj stýdentterine 24 qańtarǵa deıin uzartyldy. Qaladaǵy bankter men halyqqa qyzmet kórsetý ortalyqtarynan basqa nysandar, sondaı-aq qoǵamdyq kólikter shtattyq rejımde jumys istep jatyr.
«Eger de turǵyndarǵa qaýip tóngen jaǵdaıda qosymsha is-sharalar kúsheıtiledi. Olar týraly barlyq aqparatty qala komendaty jarııalaıdy. Munymen qosa, bizde kúrdelenip bara jatqan epıdemıologııalyq ahýaldy da umytpaý kerek», - dedi Altaı Kólginov.