Altaı Kólginov elimizdegi kreatıvti ındýstrııany damytýǵa qatysty pikir bildirdi
«Memleket basshysy kreatıvti ındýstrııany damytýdy tapsyrdy. Byltyr kreatıvti ındýstrııa týraly zańnamalyq normalar qabyldanyp, onda Úkimet pen ýákiletti organnyń quzyreti aıqyndaldy. Jaqyn arada kreatıvti ındýstrııaǵa jatatyn ekonomıkalyq qyzmet túrleri anyqtalyp, olardy yntylandarýdyń is-sharalary pysyqtalady. Bul baǵyttaǵy ózekti máselelerdiń biri Kreatıvti ındýstrııany qoldaý qoryn qurý bolyp sanalady», - dedi A. Kólginov Mádenıet mınıstrliginiń alqa májilisinde.
Onyń paıymynsha, jańa qurylym kommertsııalyq áleýeti bar shyǵarmashylyq ıdeıalardy izdestirip, olardy júzege asyrýǵa járdemdesýi tıis.
«Qordyń kómegimen startaptar óz ónimderin naryqqa shyǵaryp, venchýrlyq ınvestıtsııalardy tartýǵa múmkindik alady. Investorlardy startaptarmen tanystyrý úshin «Astana» halyqaralyq qarjy ortalyǵynda Kreatıvti ónim jármeńkesin uıymdastyrǵan jón», - dedi Úkimet basshysynyń orynbasary.
Budan buryn habarlanǵandaı, kreatıvti ındýstrııanyń el ekonomıkasyna qosqan úlesin 2025 jyly 5 paıyzǵa deıin arttyrý mindeti tur.
Foto: gov.kz