Altaı Kólginov: Basty mindettiń biri – stýdentterdi jataqhanamen qamtamasyz etý

ASTANA. QazAqparat – Jataqhana qurylysy boıynsha memlekettik-jekemenshik áriptestik tetigin tez arada jetildirý kerek. Bul týraly QR Premer-Mınıstriniń orynbasary Altaı Kólginov aıtty, dep habarlaıdy QazAqparat tilshisi.

«Kelesi mańyzdy másele – joǵary bilim salasyn damytý jumystaryn jalǵastyrý. Memleket basshysy otandyq joǵary bilimniń básekege qabilettiligin arttyrýdy, jastardyń sapaly bilim alýyna qajetti jaǵdaılar jasaýdy tapsyrdy. Basty mindetterdiń biri – stýdentterdi jataqhanamen qamtamasyz etý máselesin sheshý», - dedi vıtse-premer QR Ǵylym jáne joǵary bilim mınıstrliginiń keńeıtilgen alqa májilisinde.

Onyń atap ótýinshe, bul másele Úkimette birneshe ret qaralyp, naqty sheshimder pysyqtalǵan.

«Ony biz oryndaýymyz qajet. Mınıstrlik múddeli memlekettik organdarmen birge ýnıversıtetter men qurylys kompanııalary arasynda jataqhana qurylysy boıynsha memlekettik-jekemenshik áriptestik tetigin tez arada jetildirýi kerek. Stýdentterdi jataqhana oryndarymen qamtamasyz etý máselesin júıeli sheshý maqsatynda ýnıversıtet rektorlary ákimdiktermen, ınvestorlarmen birge belsendi jumys júrgizýi tıis», - dedi Altaı Kólginov.