Altaı Kólginov: Azyq-túlikti shekti baǵasynan asyra satqandardyń bárin jaýapqa tartamyz

NUR-SULTAN. QazAqparat – Nur-Sultan qalasynyń ákimi Altaı Kólginov elordada azyq-túlik pen taýarlardy shekti baǵasynan asyra satqan kásipkerlerdiń bári jaýapkershilikke tartylatynyn málim etti, dep habarlaıdy QazAqparat tilshisi.

«Biz azyq-túlik baǵasyna monıtorıng júrgizip otyrmyz. Bizde áleýmettik-kásipkerlik korporatsııa bar. Turaqtandyrý qory arqyly 1,3 mlrd teńge bóldik. Shekaralar jabylyp jatqannan keıin ımport boıynsha qıyndyqtar týyndaıdy. Biz 6 myń tonna un satyp aldyq. Kartop, sarymsaq, sábiz, jemis-jıdek te alyndy. Bizben seriktese jumys júrgizip otyrǵan «Magnýmǵa» alǵys aıtqym keledi. «Magnýmdaǵy» baǵany tikeleı ózim baqylaýda ustadym. Onda kartoptyń kelisi 107 teńge boldy. Maǵan «basqa jaqty qarańyz, qymbat» dedi. Iá solaı. Al biz jumys istep jatqan «SMALL», «Magným», «Astyqjanda» biz baǵany ınterventsııa arqyly baqylap otyrmyz», - dedi Altaı Kólginov Tengrınıýs.kz portalyna bergen tikeleı efırdegi suhbatynda.

Qala ákimi azyq-túlik túrleri boıynsha shekti baǵanyń bekitilgenin jetkizdi.

«Qazir jańa túsimge deıingi - maýsym arasyndaǵy kezeń ótip jatyr. ıAǵnı, mınıstrlik pen ákimdik belgilegen azyq-túliktiń shekti baǵasynan qymbattata satqan kez kelgen kásipkerdi jaýapkershilikke tartamyz», - dedi ol.