Altaı Kólginov: Aýylda turatyndarǵa úlken múmkindik ashyldy

ASTANA. QazAqparat - Batys Qazaqstan oblysy turǵyndarynyń teń jartysy aýylda turady. Elbasynyń «Nur Otan» partııasynyń kezekti XVIII sezindegi aýyl jaıly tyń bastamalary, aýyldy qarjylaı qoldaý tetikteri - sol aýyldaǵy aǵaıynǵa úlken múmkindikter ashyp otyr. Batys Qazaqstan oblysynyń ákimi Altaı Kólginov osyndaı pikir bildirdi, dep habarlaıdy QazAqparat tilshisi.

«Barlyǵymyz búgin tarıhı sheshimge kýá boldyq. Shynynda da, Elbasy - «Nur Otan» partııasynyń tóraǵasy Nursultan Ábishuly halyqtyń ómir súrý sapasyn arttyrý jónindegi úlken baǵdarlamany taǵy da bizge aıqyndap berdi. Óńirlerde azamattardyń ómir súrý sapasyn arttyrý mindeti qoıyldy. Ásirese, kópbalaly otbasylar men az qamtylǵan otbasylardyń jaǵdaıyn jaqsartýǵa erekshe nazar aýdarylyp otyr», - dedi Altaı Kólginov «Nur Otan» partııasynyń kezekti XVIII sezinen keıin tilshilerge bergen suhbatynda.

Onyń aıtýynsha, Qazaqstanda aýqatty azamattar jeterlik. Ol - eń aldymen el ekonomıkasynyń arqasy. Qazir elimizde kópbalaly otbasylardyń ishinde mekeme basshylary da bar, kásip ashqan bıznesmender de bar.

«Biraq, sonymen birge az qamtylǵan otbasylar da baryn bilemiz. Sol sanattaǵy azamattarǵa Elbasy erekshe nazar aýdarý kerektigin aıtty. Ol sanattaǵy otbasylarǵa memleketten úlken qoldaý bolatynyn bekitti. Sondyqtan, biz óńirde aýqymdy jumysty bastaıtyn bolamyz», - deıdi ákim.

Altaı Kólginov áleýmettik qoldaý týrasyndaǵy bastamalarǵa saı ár azamat eńbekke beıimdeletin bolsa, memleket odan ary damıtynyn tilge tıek etti.

«Sebebi, óziniń kásibin ashatyn azamattarǵa múmkindik taýyp bersek, shaǵyn nesıemen qoldasaq, jaqsy bolady. Kópbalaly otbasylardyń balalaryn durys tárbıeleýimiz kerek. Bilimdi urpaq bolsa, erteń ata-anasyna qolǵanat bolady. Uıada neni kórse, ushqanda sony iledi dep tekke aıtpaıdy. «Aýyl - el besigi» jáne «Qutty meken» baǵdarlamasy aýyl halqynyń eńsesin kótereri anyq. Bizdiń óńirdiń teń jartysy aýylda turady. Solarǵa Elbasynyń tapsyrmasyna sáıkes jaqsy qoldaý, múmkindikter ashylýda», - deıdi Altaı Kólginov.

Eske sala ketsek, Nur Otan» partııasynyń kezekti XVIII sezinde partııa Tóraǵasy - Memleket basshysy Nursultan Nazarbaev aýyldardy damytýǵa 90 mlrd teńge bólýdi tapsyrǵan bolatyn.