Altaı Kólginov aýdan ákimderine qardan tazalaý jumystaryn baqylaýdy tapsyrdy

NUR-SULTAN. QazAqparat - Jumys kúni bastalǵanǵa deıin Altaı Kólginov qalanyń birneshe jerlerin, sonyń ishinde jeke sektordy aralap, qardan tazartý jumystarynyń barysymen tanysty, dep habarlaıdy QazAqparat elorda ákiminiń baspasóz qyzmetine silteme jasap.

«Aýdan ákimderi kún saıyn óz aýmaqtaryńyzdy aralap, qaı jerlerdi qardan tazalaý qajet ekendigin baqylańyzdar. Qazir sý tasqynyna qarsy is-sharalardy kúsheıtýge basa nazar aýdarý qajet. Páter ıeleri kooperatıvteri men merdiger uıymdar aýla ishindegi aýmaqtardy tazalaý boıynsha jumystardy jandandyrýy tıis. Áleýmettik nysandar aýmaǵynan, jaıaý júrginshiler jolynan bólek aýla aýmaqtaryn da tazartý qajet. Páter ıeleri kooperatıvteri men merdiger uıymdar ózderine tıesili jaýapkershilikti naqty sezinýi kerek. Eger merdigerlik uıym óz jumysyn durys jasamasa, olar qar tazalaýmen aınalyspaýy kerek. Qys áli aıaqtalǵan joq, qardy belsendi tazalap, shyǵarý qajet. Jańa arnaıy tehnıkany tolyǵymen paıdalanyńyzdar», - dedi Altaı Kólginov.

Qysqy kezeńde barlyǵy 1.819.551 tekshe metr qar shyǵaryldy (151.629 reıs). Bul ótken qyspen salystyrǵanda 575.324 tekshe metr qarǵa (46,2%) artyq. Joldardy jáne trotýarlardy qardan tazalaý úshin 2019 jyldyń jeltoqsan - 2020 jyldyń qańtar aılarynda kommýnaldyq qyzmetter parki 130 arnaıy tehnıkamen tolyqty. Alynǵan arnaıy tehnıka qataryna samosvaldar, kespe tıegishter, avtogreıderler men traktorlar jatady. Arnaıy tehnıka qarajatty ońtaılandyrý men «QDB Lızıng» AQ-men birlese satyp alý esebinen alyndy. Tehnıkanyń basym bóligi - otandyq ónim. Park tehnıkasyn jańartý qyzmetkerler úshin qolaıly eńbek jaǵdaılaryn jasaýǵa jáne sanıtarlyq tazalaýdyń sapasyn arttyrýǵa múmkindik beredi. Elorda ákimi Altaı Kólginovtyń tapsyrmasyna sáıkes 2020 jyldyń qańtarynan bastap kommýnaldyq qyzmetkerlerdiń jalaqysy 10-nan 45% - ǵa deıin ósti. Sonymen qatar, eńbekaqy tóleýdiń yntalandyrýshy júıesi engizildi. Bul da kommýnaldyq qyzmetkerlerdiń jalaqysyn arttyrýǵa múmkindik berdi.