Altaı Kólginov astana jastarymen kezdesti

NUR-SULTAN. QazAqparat – Elorda ákimi Altaı Kólginov qala jastarymen kezdesip, usynys-ıdeıalaryn, muń-muqtajyn tyńdady, dep habarlaıdy QazAqparat.

Nur-Sultan ákimi jastarmen ashyq aspan astynda, «erkin mıkrofon» formatynda kezdesý ótkizdi.

«Elorda Jastary» astanalyq baǵdarlamasynyń tujyrymdamasyn ázirlep jatyrmyz. Búgin jastar uıymdarynyń ókilderimen, eriktilermen kezdesip, usynystaryn tyńdadyq. Olardyń ıdeıalaryn baǵdarlama tujyrymdamasyna engizemiz.
Jastar – elimizdiń damý draıveri, pandemııa kezinde olar koronavırýspen kúresýge zor úles qosty. Arnaıy oqytylǵan eriktiler blokpostarda kezekshilik atqardy, dezınfektsııa jumystaryn júrgizdi, dári-dármekter men qorǵanys quraldaryn tasymaldady. Zeınetkerlerimiz ben medıtsına qyzmetkerlerine kómek kórsetýdi jalǵastyryp jatyr», - dep jazdy ákim Instagram-da.

Sondaı-aq A.Kólginov Konstıtýtsııa kúni qarsańynda Elbasy N.Nazarbaev jáne Prezıdent Q.Toqaevtyń atynan jastar uıymdary men volonterlik qozǵalystarynyń belsendi ókilderine alǵys hattar tabys etti.

«Kelgen ár adamnyń pikirin tyńdaý biz úshin mańyzdy boldy. Jastar turǵyn úı baǵdarlamasynyń máselelerin kóterdi. Bıyl jumys isteıtin jastarǵa arnalǵan jalǵa beriletin turǵyn úı baǵdarlamasyn jalǵastyramyz. Sonymen birge ekologııa, volonterlik jobalardy qoldaý: túrli taqyryptar men salalar boıynsha tegin kýrstardy ótkizý, isin jańa bastaǵan kásipkerlerdi qoldaý, sportpen shuǵyldanýǵa bolatyn sport ǵımarattary sanyn arttyrý jáne t. b. máseleler kóterildi.
Jastarymyzdyń qalany damytýǵa atsalysyp jatqany qýantady. Suraqtardyń basym bóligi sheshimin tapty, qalǵandary boıynsha taǵy da kezdesýler ótkizemiz», - dedi elorda basshysy.