Altaı Invest-2018: 300 mlrd teńgeniń memorandýmyna qol qoıyldy

ÓSKEMEN. QazAqparat - Óskemende ótip jatqan ınvestıtsııalyq forýmnyń alǵashqy nátıjeleri belgili boldy. 18 elden kelgen ınvestorlar 45 memorandýmǵa qol qoıdy, dep habarlaıdy QazAqparat tilshisi.

Forým barysynda sheteldik ınvestorlarǵa 886,2 mlrd teńgeniń 110 jobasy usynylǵan bolatyn. Olar týrızm, ónerkásip, eenergetıka jáne kommýnaldyq sharýashylyq, agroónerkásip jáne memlekettik-jekemenshik áriptestik salalaryn qamtydy.

Investorlardyń nazary ekologııalyq taza azyq-túlik usynǵan jobalarǵa erekshe  aýǵanyn aıta ketý kerek.

«Shyǵys Qazaqstan álemniń 80-nen astam elimen syrtqy saýda baılanysyn ornatqan. Sondyqtan, ınvestormen yntymaqtastyq jaqsy jolǵa qoıylǵan deýge bolady. Búgingi forýmdy qorytyndylaıtyn bolsaq, 45 memorandým jasaldy. Olardyń quny 295 mlrd teńgeden asyp otyr. Plenarlyq otyrystyń ózinde jalpy quny 104 mlrd teńge bolatyn úsh joba boıynsha kelisim jasaldy. Bıyl kelissózder ekonomıkany tsıfrlandyrý máselesin kóbirek qamtydy. Kóshe shamdaryn jańartý, aýdan ortalyqtaryn sapaly beınebaqylaýmen qamtý, densaýlyq saqtaý salasyn tsıfrlandyrý, bilim berý oshaqtaryn zamanaýı qurylǵylarmen jabdyqtaý sııaqty jobalarǵa qarjy tarta aldyq. Bul jobalar júzege assa, turǵyndardyń ómir sapasy artatyn bolady» - deıdi oblys ákimi Danıal Ahmetov.