Altaı aýdanynda úılerdi sý basqany jaıly jalǵan aqparat tarady

<p>ÓSKEMEN. KAZINFORM &mdash; Shyǵys Qazaqstan oblysynyń ákimdigi Altaı aýdanynda 5 úıdi sý basqany jaıly aqparattyń shyndyqqa janaspaıtynyn málimdedi.</p>

«Búgin birqatar BAQ-ta Altaı aýdanyna qarasty 5 úıdi sý basqany týraly aqparat tarady. Bul shyndyqqa janaspaıdy. Qazirgi tańda oblysta sý tasqynynyń úshinshi tolqyny júrip jatyr. Birinshisine qardyń kóp erýi, ekinshisine taý ózenderindegi sý deńgeıiniń kóterilýi sebep bolǵan. Birinshi jáne ekinshi tolqyn kezinde turǵyn úılerdiń aýlasyna sý kirgendigi týraly birden habarlandy. Alaıda sý tasqynyna qarsy aldyn alý sharalarynyń arqasynda materıaldyq jáne adam shyǵyny tirkelmedi» dep habarlady óńir ákimdiginiń baspasóz qyzmeti. 

Úshinshi tolqynǵa jaýyn-shashynnyń mol túsýi sebep bolǵan. Osyǵan baılanysty oblystyń úsh aýdanynda saıajaı ýchaskeleri men úılerdiń aýlasyna sý kirdi.

Biraq úılerdiń ózine sý kirgen joq. 

«Máselen, Altaı aýdanynda Buqtyrma ózeninde sý deńgeıiniń kóterilýine baılanysty úı mańyndaǵy aýmaqtarǵa sý jaıyldy. Turǵyndar úshin ýaqytsha ornalastyrý pýnktteri aldyn ala daıyndaldy. Alaıda halyq óz erkimen evakýatsııadan bas tartyp, týystaryna ýaqytsha ornalastyryldy. Korobıha aýyly Korobıha ózenindegi sý deńgeıiniń kóterilýine baılanysty sý turǵyn úıler aýlasyna enbeı, kóshe boıyndaǵy tranzıt arqyly ótti. Dál qazir ózendegi sý deńgeıi tómendegen» delingen aqparatta. 

Glýbokoe aýdanyndaǵy Úlbi ózeninde sý deńgeıiniń kóterilýine baılanysty 2 mamyrǵa qaraǵan túni birneshe saıajaı ýchaskeleriniń aýlasyn sý basty.

Qyzyl sý turǵyn úılerge zalal keltirmeı, úı mańyndaǵy baqsha arqyly tranzıtpen ótken. 

Belgili bolǵandaı, táýlik ishinde ózen sýynyń deńgeıi tómendedi. 

«Qazirgi ýaqytta TJD, № 68303 áskerı bóliminiń jáne jergilikti atqarýshy organdardyń kúshterimen atalǵan aýdandardy qyzyl sýdan tazartý, sýdy burý sııaqty jumystar júrgizilýde. Sý tasqyny qaýpi bar barlyq eldi mekenderdegi jaǵdaı baqylaýǵa alynǵan» delingen habarlamada.