Almatynyń jańa bas jospary jyl sońyna deıin qabyldanady

ALMATY. QazAqparat- Ákimdik Almatynyń jańa bas josparyn osy jyldyń sońyna deıin qabyldaıdy. Bul týraly Erbolat Dosaev Áýezov aýdanynyń turǵyndarymen kezdesýinde málim etti, dep habarlaıdy QazAqparat tilshisi.

Kezdesýge kelgen turǵyndardyń biri qaladaǵy qurylys kompanııalarynyń jaýapsyzdyǵyna shaǵymdandy.

«Nege qurylysshylar eshkimmen sanaspaıdy? Olar ózen arnasynyń mańynda qurylys júrgizedi. Biz seısmıkalyq aımaqtamyz. Eger kenetten úıler qulap, arna bitelip, sel júrse she? Bul týraly bireý oılady ma?»,- dep surady qala turǵyny.

Erbolat Dosaev ákimdik jyl sońyna deıin «Almaty qalasynyń 2040 jylǵa deıingi bas josparyn» ázirlep, qabyldaýdy josparlap otyrǵanyn aıtty.

«Onda qurylysty qaı jerge salýǵa bolady, qaı jerde salýǵa bolmaıdy - barlyǵy kórsetiledi. Núkteli jáne tyǵyz qurylys boıynsha jańa ereje qabyldandy, onda qurysshylarǵa biraz shekteý qoıyldy. Bul erejeler uzaq ýaqyt qoldanylady dep úmittenemin, aqyry retke keltire alatyn boldyq. Al ózen arnasynyń boıyndaǵy ǵımarattarǵa kelsek, qala qurylysy talaptaryna sáıkes sý qorǵaý aımaǵynan 35 metrden jaqyn emes jerde ornalasýy kerek»,- dedi Erbolat Dosaev.

Ákimniń aıtýynsha, barlyq jerde, ásirese Almatyda sapa talaptary men qurylys tártibi máselesi óte mańyzdy.

«Óıtkeni, biz 9-10 balldyq seısmıkalyq aımaqta turamyz. Biz bul jumysty memleket basshysynyń tapsyrmasymen atqaryp jatyrmyz. Kelesi jyly ákimdik qajetti talaptardy pysyqtaıdy. Qala júıeli túrde qalypty damıdy dep úmittenemin»,- dedi ol.