Almatynyń úsh aýdanynda aýylsharýashylyq jármeńkeleri ótýde
«Almaty» áleýmettik-kásipkerlik korporatsııasy Ulttyq Kompanııasy» AQ qalada ótetin aýylsharýashylyq jármeńkeler sanyn kóbeıtýde. Korporatsııa uıymdastyrǵan mundaı jármeńke buǵan deıin Áýezov aýdanynda ǵana ótip kelse, senbi-jeksenbi kúnderi endi bul qatarǵa Túrksib jáne Alataý aýdandary da qosyldy.
«Almaty» ÁKK jármeńkelerdi aýdan ákimdikterimen birige otyryp ótkizilýde. Jármeńkege Almaty jáne Jambyl oblystarynyń aýyl sharýashylyq taýar óndirýshileri qatysyp otyr. Onda 185-ten astam azyq-túlik taýarlary saýdaǵa shyǵarylyp, baqsha ónimderinen bastap asqatyq maıy, shujyq ónimderi sııaqty otandyq óndirýshilerdiń daıyn taýarlary da usynylýda.
Qala basshylyǵynyń tapsyrmasy boıynsha jármeńkelerde aýylsharýashylyq taýar óndirýshileriniń óz taýarlaryn tikeleı saýdalaýy úshin barlyq jaǵdaı jasalǵan. «Almaty» ÁKK taýar óndirýshiler úshin saýda sóreleri men satýshylardyń arnaıy kıimimen birge qajetti jabdyqtardyń bárin tegin usynýda.
Atalǵan sharalardyń arqasynda jármeńkede taýarlar qalada qalyptasqan ortasha baǵalardan 20-30% arzanǵa satylýda. Mysalǵa, jaqyn bazarlarda qyryqqabattyń kelisi 180 teńgeden, sıyr eti 1200 teńgeden satylsa, Korporatsııa uıymdastyrǵan jármeńkede atalǵan taýarlar sáıkesinshe 120 jáne 850-900 teńgeden usynylyp otyr.
Maýsymaralyq kezeńde kókónis baǵalaryn turaqtandyrý jobasy aıasynda «Almaty» ÁKK jaqyn arada mundaı jármeńkelerdi qalanyń barlyq aýdandarynda ashýdy kózdep otyr. Jospar boıynsha olar aptanyń jumys kúnderinde de jáne jyldyń barlyq maýsymdarynda turaqty ótkizilip turatyn bolady.